CEBU, Philippines - Gipresentar kagahapon ang mga ebidensiya sa prosecution batok sa snatcher nga mipatay sa usa ug miangol sa kauban niini nga miresponde sa kaso sa pagpanglabni.
Atol sa hearing sa sala ni Estela Alma Sinco sa RTC-7 Branch 12, gipresentar sa prosecution ang mga ebidensiya batok ni Gerald Villeno.
Si Villeno gipasanginlan nga niadtong Abril 20,2011 nanglabni sa bag sa usa ka babaye didto sa bag-ong gitukod nga fly over sa barangay Mambaling.
Daling miresponde si Arsenio Hangin Jr., uyoan sa biktima sa pagpanglabni uban ni Felix Panugaling human mabati ang singgit sa biktima.
Apan gipaulanan sila og bala sa akusado ug naigo si Hangin kinsa namatay sa maong higayon, samtang si Panugaling nasamdan usab. Atol sa hearing si Panugaling positibong mitudlo sa akusado nga maoy namusil kanila.
Ipadayon pa ang hearing sa maong kaso. (BANAT NEWS)