CEBU, Philippines - Malamposon ang gipahigayong musical tribute kagahapon sa hapon alang kang anhing Maestro Emilio “Mil†Villareal ug Queen of Visayan Songs nga si anhing Susan Fuentes.
Ang maong kalihukan gipasiugdahan sa magtiayong Dr. Jose “Dodong†ug Nena Gullas kinsa maoy mga founder sa JRG Halad Museum. Ang magtiayong Gullas naningkamot sa pagpreserba sa mga Sugboanong awit ug kulturang Sugboanon aron madungog ug makita pa kini sa mga bag-ong henerasyon.
Kini gipahigayon mismo sa nahisgutang museum nga nahimutang sa eskina dalan V. Gullas ug D. Jakosalem, dakbayan sa Sugbo. Si Maestro Mil usa kini ka Cebuanong composer ug music director nga nagbase na sa Canada samtang si Fuentes usa ka Sugboanong mang-aawit.
Gawas niini ang nahisgutang kalihukan kagahapon nagsilbing paghinumdum sa pagkamatay sa apo ni Sir Dodong nga si Kyle David Gullas Weckman kinsa namatay niadtong Septiyembre 12, 2012 human kini malumos atol sa ilang field trip ngadto sa Luzon. Mitambong sa maong tribute ang mga pamilya nila ni Maestro Mil ug Fuentes mitambong usab kagahapon. Lakip usab sa mga mitambong si Mayor Michael Rama kinsa mahiligon usab sa mga kantang Sugboanon ug si Bise Mayor Edgardo Labella. Kagahapon si Girlie Lapinid, Cebuano Diva ang mikanta sa tulo ka mga awit ni Fuentes nga mao ang Nahisulat sa Hangin, Ikaw ug Hain na. Ang maong mga kanta gi-arrange ni kaniadto ni Maestro Mil.
Matud ni Lapinid nga si Maestro Mil mao usab ang iyang mentor dili lang sa pagkanta lakip na usab sa iyang pagkatawo.
Si Mrs. Enriquita “Tita†Villareal, asawa ni Maestro Mil mihulagway nga ang iyang bana usa ka buotan, simple, manggihatagon ug maayong tawo. (BANAT NEWS)