CEBU, Philippines - Mga mananagat ug molupyo sa mga barangay nga nahimutang sa daplin sa kabaybayonan sa dakbayan sa Lapulapu ug lungsod sa Cordova ang nagpadayon nga nahasol sa madagsa nga mga patay’ng lawas sa tawo gikan sa nalunod nga barko nga St. Thomas Aquinas sa 2Go Shipping.
Si SPO3 Lydo Pinos sa Homicide Section sa kapolisan sa maong dakbayan nga nahinabi sa Banat News miingon nga ang 58-anyos nga si Nido Bagiuo nga nangahoy sa daplin sa baybayon sitio Panas Dako sa barangay Calawisan wala magdahom nga makakaplag og putol nga tiil nga nasangit sa kabakhawan.
Matud pa niya nga sukad sa Agosto 18 nga maoy ikatulong adlaw sa pagkalunod sa St. Thomas Aquinas sa 2Go Shipping sa dakbayan sa Talisay sige na lang silang makatubag og alarma sa patay’ng lawas nga gidagsa.
Samtang si SPO2 Danny Alboro sa kapolisan sa lungsod sa Cordova nga nahinabi sa Banat News miingon duna pa silay nakaplagang lawas nga naputol sa hawakan paingon sa ulo ug wala na nila mahibaw-i kung lalaki ba kini o babaye.Kagahapon dugang unom pa ka mga namatay nga pasahero sa nalunod, ang usa didto na gikan sa Bohol ug gani gilubong na kini apan giugkat og balik tungod sa mando sa mga awtoridad dinhi sa Sugbu.
Ang unang napalgan niadtong alas 12:00 sa udto didto sa kadagatan sa barangay Bangbang Cordova nga naglutaw lutaw nakit-an kini sa usa ka mananagat nga wala nay usa ka walang kamot ug wala nay duha ka tiil.
Matud ni PO3 Alex Naron sa Cordova Police pagka alas 4:10 sa hapon laing lima pa ka patay’ng lawas ang napalgan nga naglutaw sa dagat, ang mga sakop sa Cordova Marine watch didto sa Gapasgapas Islet maoy nakakaplag niini. (/EIM) (BANAT NEWS)