CEBU, Philippines - Gub-on na sa mga sakop sa Cebu City Hall demolition team ang kabahin sa Abay-Abay Junk shop nga nag-ukopar sa aseras diha sa Happy Valley nga sakop sa Barangay Labangon.
Matud ni Raquel Arce ang pangulo sa Prevention Restoration Order and Beautification Enhancement (Probe) nga padad-an na nila og notice of violation ang Abay-Abay Junk shop ug wala nay second notice.
Ang 72-hour notice nga ipadala nila sa City Hall ngadto sa tagdumala sa Abay-Abay Junk shop mapupos unya sunod semana ug nagpasabot nga mahimo na kini nga idemolis.
Si Arce miingon nga gipasusi na niya sa iyang mga sakop ang maong lugar og nakonpirmar nila nga ang junk shop nakalapas gayud sa balaud kay gigamit niini ang aseras sa ilang negosyo.
Si Kapitan Victor Buendia sa Labangon mireklamo ug nagpatabang sa City Hall kay ang maong junk shop maoy hinungdan nga midagsang ang pagpangawat sa ilang dapit.
Matud ni Buendia nga ang mga basurero moapil sa pagpanguha sa mga butang sa lainlaing panimalay nga ilang maagian mao nga daghan ang mireklamo nga mga lumulopyo. (/EIM) (BANAT NEWS)