CEBU, Philippines - Patay ang usa ka 23-anyos nga lalaki human kini makuryentihi samtang nagkubikubi sa telebisyon sa ilang pinuy-anan dihang natumba ang antenna niini ug nasangit sa secondary wire sa Camotes Electric Cooperative niadtong Sabado sa alas 6:45 sa buntag diha sa barangay McArthur, Tudela sa isla sa Camotes.
Ang patay nang nadangat sa tambalanan human nasunog ang kalawasan mao si Buddy Montes, 23, nagpuyo sa maong lugar.
Subay sa imbestigasyon sa kapulisan sa Tudela pinangulohan sa hepe niini Insp. Jonas Tajanlangit samtang nagtan-aw sa salida sa telebisyon si Montes kalit lang natumba ang antenna niini sa telebisyon ug didto mosanday sa secondary line sa Camotes Electric Cooperative.
Nakamugna dayun kini og spark sa tibuok koneksyon sa pinuy-anan maong gidali dayun unta og disconnect ni Montes ang kutay sa kuryente sa luyong bahin sa telebisyon aron dili madaut.
Apan tungod sa kakusog sa boltahe mao na hinoon kini ang nakuryentihan ug pagsalbar sa mga silingan nasunog na ang lawas niini, gisuwayan pa siya pagdala ngadto sa Ricardo Maningo District Hospital sa lungsod apan gideklarar nga patay na.
Ang patay’ng lawas sa batan-on kasamtangan karung gipahiluna sa punerarya sa maong lungsod alang sa awtopsiya.
Mipahimangno ang kapolisan nga sa ingon niining mga sitwasyon likayan ang pagkupot sa mga wirings sa panimalay tungod kay dako ang posibilidad nga dunay kuryenteng nagkatay sa bisan unsang kable sa sud sa balay. (/EIM) (BANAT NEWS)