CEBU, Philippines - Susihon sa buhatan sa Bureau of Food and Drugs (BFAR) Region 7 ang taho nga ang mga brush sa pintal nga gigamit sa mga barbeque stand ug restaurant sa ilang pagluto og barbeque kontaminado sa makahilo nga kemikal.
Kini ang gipadayag ni Rica Aumentado, Food and Drugs Regulation officer sa BFAD Region 7 nga nahinabi sa Banat News kagahapon sa buntag.
Hinuon si Aumentado miingon nga sa dili pa nila kini himuon, ilang unahon ang pagsuta sa mga barbeque stand o restaurant nga giingong naggamit og mga paint brush nga kontaminando sa toxic chemicals.
Dugang pa niya nga ang pagsusi niini maoy ilang basehan sa taho gikan sa Philippine Earth Justice Center (PEJC) and EcoWaste Coalition.
Ang maong lakang maoy tubag sa awhag sa duha ka grupo sa mga environmentalist sa Sugbo nga misusi niini.
Matud pa sa maong environmentalist sa duha ka grupo nga ang mga barbeque stand sa Carbon sa dakbayan sa Sugbo maoy ilang nasusi ug nasuta nga ang gigamit nila nga mga brush sa pintal kargado og toxic chemicals.
Gani usa kini sa hinungdan nga daghan na kaayong nagmasakiton og kanser gumikan sa maong kemikal. (/WC) (BANAT NEWS)