Mga piskaliya sa Lapulapu madugangan

CEBU, Philippines - Madugangan na  ang  piskaliya sa dakbayan  sa Lapulapu  karong   aprobado  na   ang  balaodnon  nga  gihandus  ni  lone district Congressman Arturo Radaza alang  ning  maong  tinguha. Tungod  niini  malipayon  niyang  gipahibawo  ang  mga Oponganon  kalabot  sa paglig-on  ni Pres. Benigno "Noynoy" Aquino III  sa maong balaodnon nga iyang giduso  ngadto  sa  kongreso.

Atol sa ika 52 nga kasaulogan sa Charter Day sa dakbayan sa Lapulapu ,si Congresswoman -elect Aileen Coro Radaza maoy gitahasan  sa iyang  amahan pagbasa sa iyang mensahe nga maghatag og dugang buhatan sa Regional Trial Court (RTC) ug Municipal Trial Court in Cities (MTCC) sa dakbayan sa Lapulapu ug sa probinsiya sa Sugbo.

Ang dugang korte sa dakbayan sa Lapulapu makatabang  sa dali ug paspas nga ligid sa hustisya nga gipangita sa usa ka   kihante ug akusado.

Gumikan sa nagtipun-og nga kasong gihuptan sa matag korte hinay ang dagan sa hustisya sa nasud.

Busa  dako kaayo  og ikatabang  sa pagpakanaog  sa hustisya   ang  mga  ikadugang  nga  korte  nga mohusay  sa mga  kaso  sa lalawigan sa Sugbo  ug  sa Lapulapu, matud  pa  ni Cong. Radaza.

Lakip sa gipasigarbo niya  ang gahin nga P300 milyones  alang sa pagpalapad sa mga kadalanan palibot sa dakbayan sa Lapulapu, ug ang  P112 milyones  alang sa turismo.

Kahinumdoman nga lakip si PNoy mihatag usab og gahin sa DPWH   nga P3.7 bilyones  alang sa pagpalapad sa kadalanan sa dakbayan sa Lapulapu hangtod sa lungsod sa Cordova nga gisugdan na karong panahona.

Samtang gipasalamatan ni Cong. Radaza ang mga Oponganon nga mibutang kaniya sa ubos bay balaoranan  hangtud  sa  pagkapupos sa iyang termino karong Hunyo 30 .

Midugang  si  Radaza   nga   nagbilin  siya   og maayong ngan sa dakbayan sa Lapulapu ngadto sa hawanan sa Kongreso.

Gumikan niini dako siya  og  pagsalig sa iyang anak nga si Cong.  Aileen Radaza nga mapadayon niini ang  iyang  mga maayong plano alang sa kaayohan sa dakbayan sa Lapulapu. (BANAT NEWS)