CEBU, Philippines - Daghang mga opisyal sa kabarangayan dinhi sa dakbayan sa Sugbo ang mura’g walay gana nga makaangkon sila’g proyekto nga gastohan sa pundo gikan sa Annual Investment Plan.
Mao kini ang gibutyag ni Oscar Abordo, ang assistant chief sa Cebu City Planning and Development Office (CPDO) nga gikahinabi sa mga reporters kagahapon.
Si Abordo mibutyag nga daghang mga barangay kansang mga opisyal wala makasumiter og proyekto nga gusto nila nga mugnaon sa ilang barangay bisan og sila gitagsa-tagsa pag-awhag.
Matud hinoon ni Abordo nga dili kaayo dagku nga kantidad ang mahatag ngadto sa kabarangayan gikan sa AIP apan makatabang na kini kaayo alang sa ilang mga proyekto.
Si Abordo miingon nga ang gahin sa Annual Investment Plan katumbas kini sa 20 porsento sa kinatibuk-ang koleksyon sa Real Property taxes sa usa ka local government unit.
Ang ubang mga opisyal sa barangay mitug-an kanila ni Abordo nga ang usa sa mga rason nga wala sila makasumiter og project proposal alang sa ilang barangay mao nga dili sila maantigo mohimo og mga plano sa proyekto.
Gitambagan sila ni Abordo nga magpatudlo sa mga maantigo kun unsaon paghimo ang mga supporting documents sa ilang proyekto aron sila makapahimulos sa gahin sa AIP. (BANAT NEWS)