CEBU, Philippines - Nadakpan sa buybust operation sa kapulisan tungod sa pagpamaligya og gidiling drugas ang barangay kagawad sa barangay-6 sa lungsod sa Tuburan niadtong Martes sa alas 6:40 sa sayong kagabhion.
Ang nadakpan ug nagtingkagol na karon sa karsel mao si Francisco Tabotabo, 28 anyos, minyo ug kagawad sa maong barangay ug nagpuyo sa Sityo Kalubihan barangay 6.
Matod ni PO1 Joseph Bejer sa Tuburan Police dihang nahinabi sa Banat News taud taud na nilang gipanid-an ang suspek tungod sa pagpayuhot niini og gidiling drugas apan wala gyud kini mopatuo.
Gani giwarningan na kini kaniadto aron mohunong na sa pagpakiglambigit sa illegal nga transaksiyon sa gidling drugas.
Dihang nakadawat og inpormasyon ang kapulisan kabahin sa presensiya sa suspek dali dayung gilusad ang buybust operation pinangulohan sa hepe nga si Sr/Insp. Florendo Fajardo kauban sila si PO2 Roberto Rondina ug PO1 Mark Anthony Quijano.
Matod pa nagpakaaron ingnon nga user ang usa ka polis ug mao kini nakig transaksyon aron mopalit og shabu ug didto dihang nikagat na gitunol dayun niini ang marked money nga 500 pesos duha ka tag 200 pesos ug usa ka P100 ug dihang gitunol na niini ang usa ka pakite sa plastic nga gituohang dunay sud nga shabu gidakop dayon kini pinaagi sa pagpaila nga polis.
Wala na makaugpo pa ang suspek ug gidakop kini sa mga polis ug gibalhug sa karsel ug kagahapong adlawa gipasakaaan na kini og kaso sa korte. (BANAT NEWS)