CEBU, Philippines - Gipasakaan og kasong “harboring of criminal†sa piskaliya sa dakbayan sa Talisay niadtong Martes ang duha ka tawo kinsa giingong mitabang sa pagpaikyas ug pagtago kang Joavan Fernandez.
Ang gipasakaan og kaso mao sila si Jeffrey Sy kinsa giingong maoy drayber sa sakyanang gisakyan ni Joavan sa pag-ikyas gikan sa Talisay City detention cell ug ang usa ka giingong bayot nga giilang si Harold Bermudo.
Si Senior Inspector Alan Cuizon kinsa nahinabi sa Banat News kagahapon mibutyag nga base sa ilang nakuhang impormasyon si Bermudo maoy tig make-up kang Joavan matag mogawas kini aron dili mailhan.
Gawas niini duna pay laing kauban ang nahisgutang mga suspetsado kinsa giila lang sa ngalan nga “Cathy†nga tawgon nila og “Katkat.â€
Matud ni Cuizon nga si Cathy ang giingong suguon aron mangabang og mga sakyanan nga kasakyan ni Joavan kung mogawas-gawas kini.
Kahinumduman nga niadtong Lunes sa hapon ang grupo ni Joavan mi-check-in kini diha sa Pacific Cebu Resort sa Suba, Basbas sa dakbayan sa Lapu-Lapu apan si Joavan ug Cathy nakaikyas sa mga polis.
Ang duha sakay sa usa ka kolor puting Ford Everest nga sakyanan nga nagtangag sa plakang YKK-499.
Dihang gigukod si Joavan sa mga polis daling gisirado sa gwardiya ang gate sa resort aron dili kini makagawas apan giingong gibanggaan ni Joavan ang gate.
Gawas niini giingong gibanggaan usab ni Joavan ang sakyanan sa Philippine Air Force nga niadtong higayona nagpahigayon og checkpoint.
Si Cuizon nagtuo nga wala pa makagawas sa Sugbu si Joavan. (BANAT NEWS)