CEBU, Philippines - Gipahibalo ni Mayor Michael Rama nga mopahigayon siya og lahugay sa mga department head sa Cebu City Hall karong Hulyo kun mosugod na siya sa ikaduhang termino pagka mayor.
Matud ni Rama nga risgo alang niadtong mga department head nga nahibaw-an niya nga nagpadayon sa ilang pagsuporta sa kaatbang niya sa politika sa miaging eleksyon.
Si Rama miingon nga dili hinuon niya igsapayan kun ang maong mga department head dili iyang dumadapig basta maayo ra sila nga motrabaho sa ilang katungdanan.
Ang nabalak-an ni Rama nga kun ang magdumala sa usa ka departamento mao ang mga tawo nga tua modapig sa iyang kaatbang sa politika unya sabotaheon ang iyang administrasyon.
Ang Cebu City Hall adunay kapin sa 20 ka hepe sa departamento ug pipila kanila migawas gikan sa kwarto nga gihimoan nila sa tigom uban ni Rama mga duha o tulo ka semana na ang milabay.
Matud sa mga department head nga giingnan sila ni Rama nga kadtong dili makatabang kaniya sa politika mahimong mogawas lang sa kwarto nga gihimoan nila sa tigum.
Si City Veterinarian Alice Utlang ug City Attorney Joseph Bernaldez apil sa migawas gikan sa kwarto.
Ang mayor gidid-an pa sa pagtangtang sa mga opisyal ug kawani hangtud sa Hunyo 12.
Matud ni Rama nga tumong niya nga maserbisyohan gayud pag-ayo ang katawhan sa mosunod pa nga tulo ka tuig niya nga pangatungdanan. (BANAT NEWS)