CEBU, Philippines - Tulo ka mga langyaw ang nakawatan sa ilang mga salapi ug butang nga mokabat sa P551,147 sa managlahing mga lugar dinhi sa Sugbo sa miaging adlaw.
Ang Japanese nga si Tumohiro Kudo, 51, kasamtangang nagpuyo sa 04 Green Hills Casuntingan sa dakbayan sa Mandaue, nawad-an sa iyang mga butang ug salapi nga mokabat sa P172,932.00 nga nahabilin sa taxi nga iyang gisakyan padulong sa Pier 4, Brgy. San Roque dakbayan sa Sugbo. Ang mga nahabiling butang ni Kudo sa iyang gisakyang taxi mao ang bag nga may sulod nga 200,00 yen (P 80, 932.93) ug P10,000 nga cash,mga camera, Iphone 5 Oaklay sunglasses.
Samtang nakuotan usab sa iyang handbag ang Danish nga si Sissel Vorre, 22, samtang nagkaon sa usa ka popular nga fastfood chain sa Osmeña Blvd.
Sulod sa handbag ni Vorre ang cellphone HTC/HD Desire, mga gadgets, Danish Passport, Danish Drivers License ug P10,000 cash nga salapi ug uban pa.
Laing langyaw usab nga usa ka Briton nga si Gary Keith Bradsley, 61, nagpuyo sa Leyson St. Brgy. Talamban ning dakbayan ang nabiktima sa pagpanglungkab dihang gisud sa mga kawatan ang iyang balay.
Mokabat sa P306,000 ang balor sa mga gamit, alahas, ug cash nga P90 mil ang nakuha sa mga kawatan nga nakasud pinaagi sa pagguba sa ilang bintana.
Ang Theft and Robbery Section sa Cebu City Police Office padayon pang nag-imbestigar sa kaso. (Kristianne Marie Alcaria ug Ray Anthony Espedido,CNU Interns/EIM) (BANAT NEWS)