CEBU, Philippines - Sa unang higayon, mikabat sa 21 ang migraduwar nga depektoso og panan-aw kon buta o Visually Impaired (VI) sa Area Vocational Rehabilitation Center (AVRC)II, usa ka vocational training center sa Department of Social Welfare and Development (DSWD) sa Labangon Cebu City human sila eksamina sa Department of Health (DOH)7.
Matud pa ni Jaybee Binghay, tigpamaba sa DSWD-7 nga lakip sa mikuha sa maong eksaminasyon niadtong miaging Disyembre 2012 ug usab niadtong Enero ning tuiga mao ang kapin sa 1000 ka mga propesyonal nga walay apan sa panglawas.
Sa maong eksamin nahimong 3rd placer sa Massage Therapy Licensure Examination si Olymar Adiba, 25, nga usa usab ka membro sa AVRC.Si Herminia Cabahug, Training Center Superintendent sa AVRC 11 miingon nga ila kining gikonsiderar nga usa ka dakong pasidungog sa DSWD tungod kay mao kini ang unang higayon nga ang ilang mga tinun-an nga buta mograduwar.
Matud pa ni Cabahug nga kasagaran usab kanila wala magtungha, ug ang uban miagi og 6 ka bulan nga review program nga gipasiugdahan sa DSWD uban sa abag ni Martites Tatara nga usa ka Training Provider sa In-Care ug Helping Hands nga organisasyon. Si Adiba sa iyang bahin nagkanayon nga ang mga masahista sama kaniya naningkamot gayud pag-ayo sanglit gikasangka nila ang dili mga buta ug kasagaran kanila mga propesyonal na sa pagkamasahista.
Midugang siya nga ang kalampusan diay sa tawo di mag-agad sa kahimtang sa iyang lawas kundi anaa sa kakugi, paningkamot ug uban sa paggamit sa utok. (BANAT NEWS)