CEBU, Philippines - Gihimug-atan karon ni magpapatigayong Glenn Soco ang nag-unang problema bahin sa edukasyon sa mga batan-on sa kalungsoran ug dakbayan ning lalawigan nga angay hatagan og pagtagad sa gobiyerno.
Matud pa ni Soco nga iya kining nadiskubrehan sa pagsuroy-suroy niya sa kalungsoran ug kabarangayan sa palibot sa lalawigan sa iyang pagpaila bahin sa iyang kandidatora sa pagka-bise gobernador sa lalawigan sa Sugbo sa umaabot nga piniliay sa Mayo 13 ning tuiga.
Miingon si Soco nga sagad sa mga hinungdan sa kahubo sa edukasyon sa mga batan-on sa kabukiran ug kaislahan sa lalawigan mao ang kakabus nga di makaapas sa kamahal sa gasto sa pagtungha sa kolehiyo.
Gumikan niini natibuok ang laraw ni Soco nga kun kahatagan siya og higayon nga modaug sa umaabot nga election, iyang ikatag-katag ang mga sanga sa iyang eskuylahan nga maoang Global Power Skills Development Center ngadto sa tanang lungsod sa tibuok lalawigan aron adto na motungha ang mga kabus nga batan-on nga walay ikasarang sa mga mahalong kolehiyo karon.
Matud pa ni Soco nga ang iyang eskuylahan akreditado usab sa Technical Skills and Development Authority (TESDA) ang ahensya sa gobiyerno nga nagtugot sapagbansay sa mga kabus ug mga kursong bokasyonal alang sa gikinahanglang batakang panginabuhinila karong panahona.
Midugang siya nga awhagon niya ang gobiyerno pagtukod og mga provincial colleges aron ihatag nga libre ngadto sa mga kabus ang bayranan niini aron makakab-ot sila og tag-as nga edukasyon nga sarang makaabag kanila pagkaplag og maayong trabaho ugma damlag.
Sumala pa ni Soco ang edukasyon usa sa katungod sa matag tawo nga maoy gusto niyang ikahatag sa mga kabus nga mga batan-on sa kabarangayan, kalungsoran ug dakbayan ning lalawigan. (BANAT NEWS)