Mga biktima sa tulis gipaabot sa kapolisan sa Talisay nga moadto sa ilang buhatan

CEBU, Philippines - Kapolisan sa dakbayan sa Talisay naghuwat sa ubang mga biktima sa tulis sa duha ka mga suspetsadong tulisan nga midala sa cash drawer sa Shell Gasoline Station sa barangay Lawaan III, dakbayan sa Talisay niadtong milabay’ng semana.

Kahinumduman nga si Shundave Villarosa alyas “Shundave Oyon-oyon ug Jap-jap”, 30-anyos ug Jose Rolando Coronel, 40, parehong taga dakbayan sa Talisay nasikop sa gipahigayong hot pursuit operation sa kapolisan diha sa usa ka balay sa Camella Homes, barangay Lawaan I, Talisay.

Ang officer-in-charge sa Talisay City Police Station nga si Superintendent Elmer Lim nagkanayon nga napasakaan na og kasong robbery, paghupot ug ginadaling drugas ug illegal possession of firearms kalambigitan sa Comelec gun ban diha sa piskaliya sa Talisay ang maong mga suspetsado.

Si Lim nga nahinabi sa Banat News nagkanayon nga si Villarosa usa sa mga suspetsado sa mga insidente sa tulis diha sa Tabunok.

Matud ni Lim nga human makabiktima si Villarosa motago na dayon kini ug magpalinaw-linaw usa una mogawas og balik ug manulis na usab.

Gani niadtong buwan sa Enero si Villarosa giingong nanulis na usab kini diha sa Tabunok ug giingong niadtong buwan sa Disyembre sa milabay’ng tuig si Villarosa ug Coronel ang suspetsado sa pagpanulis sa nahisgutang gasoline station.

Ang Shell Gasoline Station sa Lawaan III tulo na ka higayon kining natulis matud sa mga polis.

Gibutyag ni Lim nga niadtong tuig 2009 si Villarosa nadakpan kini sa mga polis sa Talisay tungod sa paghupot og pusil nga walay lisensiya ug pagka tuig 2010 nadakpan usab ang suspetsado tungod sa paghupot og ginadiling drugas.

Ang mga biktima sa tulis gitawagan na sa kapolisan nga moanha sa police station aron pag-ila sa mga suspetsado aron moduso usab kini og reklamo apan matud  ni Lim walay bisan usa sa mga biktima nga mianha sa ilang buhatan.  (BANAT NEWS)