Masakitong bata gibiyaan sa inahan diha sa polis

CEBU, Philippines - Usa ka 4-anyos nga batang babaye nga may hydrocephalus ang wala na balika sa usa ka inahan diha sa balay sa usa ka polis sa sitio Hawod, barangay Bulacao, dakbayan sa Talisay.

Si SPO2 Nestor Canlobo kinsa nadestino sa Talisay City Police Station mibutyag sa mga tigbalita kagahapon nga ang inahan sa maong bata giingong tiggamitan og ginadiling drugas.

Ang maong 29-anyos nga inahan nakaila sa manghud sa polis ug magkanunayan na kini sa ilang balay.

Sa nahipos nilang report ang maong inahan dunay lima ka mga anak ug ang gibilin diha sa ilang balay nga dunay balatian ikatulo kini sa lima ka mga anak.

Nakadawat sila og report nga gipamiyaan sa inahan sa bata ang ubang mga anak sa mga kaila niini, ug duna say giingong gibaligya niini sa ubang tawo.

Matud ni Canlobo nga na-problema na sila sa pag-atiman sa bata nga usa ka buwan nang sila na ang nag-atiman.

Kagahapon si Canlobo nangayo og tabang sa City Social Welfare sa Talisay kabahin sa ilang problema. (/EIM) (BANAT NEWS)