CEBU, Philippines - Mopahigayon og kaugalingong imbestigasyon ang United States Navy kalabot sa alegasyong usa sa ilang mga barkong gikontrata nga moserbisyo sa mga barkong panggubat sa Amerika ang miyabo og mga makadaot sa kinaiyahan nga basura diha sa Subic Bay.
Ang MV Glenn Guardian usa ka logistics ship gipanag-iya sa Malaysian shipping firm nga Glenn Defense Marine Philippines. Ang Subic Bay Metropolitan Authority (SBMA) kasamtangan na karong nagpahigayon og kaugalingon nilang imbestigasyon kabahin sa nahitabo samtang mipadayag si Sen. Miriam Santiago nga himoan og inquiry sa Senado ang maong hitabo sumala pa sa report sa GMA News Online.
Sumala pa sa report nga ang maong barko mibugwak og sobra-sobra sa gidaghanong makadaot nga basura sa kadagatan sa Subic Bay.
"We oppose economic degradation, we oppose illegal dumping. We are aware of these allegations, the United States Navy is investigating," pagklaro ni United States Ambassador to the Philippines Harry Thomas Jr. atol sa pagsaulog sa Veterans' Day sa Manila American Cemetery and Memorial sa Taguig City.
Matud pang Thomas wala maapil o masakop sa kasamtangang Philippines-US Visiting Forces Agreement ang maong barko tungod kay kinontrata lang kini nga mga barko ug dili barkong panggubat.
Ang maong hitabo nakapaukay sa mga daan nang supak sa VFA ug nanawagan sa gobiyerno nga putlon na ang kasabutan tali sa Pilipinas ug sa US.( /EIM) (BANAT NEWS)