Atensyon PROBE Team

Nindot kaayo ang gihimo sa mga sakop sa PROBE Team nga ilang giatiman ang paghawan sa daplin sa Gorordo Avenue pinaagi sa pagpaguba sa tindahan nga gitukod ngilit gyud sa aseras.

Kon imo gyud nga tan-awon, may kalakwan pa baya unta sa mga tawo sa aseras, apan usahay lang, ang sidewalk ukopahon sa mga tag-iya sa tindahan, nga ang uban kanila namaligya og mga produkto nga hinimo sa kawayan, sama sa lantay ug mga lingkoranan.

Maayo usab kay nakasabot ang mga tag-iya sa tindahan ug boluntaryo sila nga miguba sa ilang mga estraktura kagahapon kay nasayod sila nga dili ila ang luna nga ilang gigamit.

Usbon nako, saludo ko sa gihimo sa PROBE Team nga mihatag gyud og notice of demolition sa mga hingtungdan. Ang mga hingtungdang tag-iya sa tindahan, nangindahay nga tabangan unta sila sa siyudad.

Kon ako maoy kuhaan og baruganan, dili na sila angay’ng tabangan kay wala man gyud sila mamuyo diha. Gigamit ra nila kini isip tindahan  apan hinoon gipuy-an ra sab aron dili kawaton ang ilang mga baligya.

May pipila pa ka luna nga gipaabangan pa isip grahe sa sakyanan niadtong motorista nga walay grahe.

* * *

Awhagon hinoon nako ang mga sakop sa PROBE Team nga gipangulohan ni Raquel Arce nga hawanan nila ang mga kabahin sa mga balay nga nag-anam-anam na pagkaylap sa Kamagong Street, likud sa barangay hall.

Anugon kaayo ang gihimo sa sakop sa City Hall demolition team kaniadto, atol sa termino gihapon ni Mayor Tomas Osmeña, kay gipasagdan man lang ug wala na atimana atol sa administrasyon ni kanhi mayor Mike Rama.

Kay gipasagdan ra man, ang gihawanan na unta nga lugar daplin sa karsada, gibalikan pagtarok og panimalay. Tan-aw nako, mao nga wala dayona ang pagpalapad sa Kamagong Street kaniadto tungod kay si Konsehal Mary Ann delos Santos nga kapitan pa sa Lahug, alyado pa man ni Rama.

Karon, nabali ang sitwasyon kay si Delos Santos alyado na man usab sa mayor. Kon ilang apikehon ang mga nagpuyo daplin sa Kamagong Street, sila mga botante sa dakbayan, ug mao gyud ni ang sagad nga kahadlokan sa mga politiko.

Nindot na unta agian ang Kamagong Street ug ang pag-aspalto na lang ang kuwang kaniadto, apan karon mibalik ang mga mapahimuslanong pamilya sa pagpalapad sa ilang balay ngadto sa karsada.

Hangyuon nato si Delos Santos nga mangunay siya sa paglihok aron ang Kamagong Street mahimong kaagian sa daghang sakyanan ug sa ingon, maiban-ibanan ang mga sakyanan nga moagi sa Gorordo Avenue.