Pagbantay sa kabataan, kaakohan sa tanan — CCPO
CEBU, Philippines — Gipahinumdoman sa Cebu City Police Office (CCPO) ang tanan nga ang pagbantay sa mga kabatan-onan ilabi na mga menor de edad trabaho sa tanan ug dili lang sa kapulisan.
Gani aron malikayan nga kining mga menor de edad bisan disoras sa kagabhion naa gihapon sa gawas gipatuman sa CCPO ang curfew hours sa siyudad pinaagi sa Oplan Disiplina.
Base ordinansiya sa Siyudad sa Sugbo ang curfew hours sa mga menor de edad magsugod sa alas 10 sa gabii hangtod na sa alas-4 sa kaadlawon.
Si Police Lt. Col. Janetter Rafter, Deputy City Director for Administration sa CCPO miingon nga ang pag-rescue sa mga menor de edad gikan sa kadalanan dako og papel ang barangay officials apil na ang mga ginikanan.
"Sa atong implimentasyon sa curfew kay kining atong mga minors dili na nato pwede i-fine, wala man tay laing pwede mahimo kun dili dad-on sa barangay, then the barangay will coordinate sa parents niini mga bataa unless nga wala'y mga parents that's when the barangay will get into, so again kining atong problema sa menor de edad it's not just a problem of police but it's a problem of whole community gyud," sigon ni Rafter.
Gusto karon ni CCPO Director Colonel Ireneo Dalogdog kung unsa nay nahitabo sa mga bata nga na-rescue kaniadto aron mahibaw-an kun dunay uban niini balik-balik na nga na-rescue.
Mihangyo sab ang kapulisan sa mga ginikanan nga matag karon ug unya pangitaon ang anak, tan-awon kung nakauli na ba ug wala maglaroy-laroy sa dalan bisan og gabing dako na.
Giklaro hinoon ni Rafter nga dunay mga exemptions ang curfew sa menor de edad, kinahanglang duna silay kaubang hamtong o kaha gisugo ilabi na sa pagpalit og tambal sa botika.
Kining pahinumdom sa kapulisan gibalik og pahibalo aron malikayan ang nahitabo sa Lungsod sa Liloan diin dunay grupo sa mga batan-on nga gipangrakrakan nga miresulta sa pagkamatay sa 16-anyos nga dalagita ug pagka angol sa laing duha ka batan-ong lalake. (BANAT NEWS)
- Latest
