CEBU, Philippines — Nakabsan sa kinabuhi ang 16 anyos nga batan-ong babaye samtang angol usab ang duha ka mga amigo niini nga nag-edad og 18 ug 17 anyos human ang ilang grupo samtang ang-inom ug nag-standby sa usa ka convenience store sa Barangay Yati, Lungsod sa Liloan gipaulanan og bala kagahapon sa alas 4 kaadlawon.
Ang nakalas sa hitabo residente sa Looc, Poblacion ug ang duha nga naangol kay nagpuyo sa Landing, Catarman ug Yati nga pulos sakop sa Lungsod sa Liloan.
Nakaangkon og samad pinuslan sa wala ug tuo nga dughan ang namatay nga 16-anyos nga babaye samtang ang 18 anyos nga lalake naigo sa wala nga dughan ug sa wala nga batiis, ang 17-anyos nakaangkon og upat ka samad-pinusilan sa bat-ang niini.
Nadala pa ang 16-anyos sa Eversly Hospital sa Dakbayan sa Mandaue apan nakabsan gyud kini sa iyahang kinabuhi samtang ang duha nga angol padayon nagpaalim sa laing tambalanan nga gidad-an kanila.
Gisubay karon sa Liloan Police Station pinangulohan ni Major Eric Gingoyon kung personal grudge, love traingle o gang war ang motibo nganong gipamusil sa mga lalaking sakay og lima ka motorsiklo ang mga biktima.
Gitug-an ni Gingoyon nga niadtong Mayo 4 sa kaadlawon dunay nahitabong rambol sa dapit nga duol ra sab sa lugar kung asa nahitabo ang pagpamusil.
Giimbestigaran na sa kapulisan kung ang grupo sa mga batan-on nga nalambigit sa rambol niadtong Mayo 4 mao ba ang grupo nga gipaarakan.
“Karon on-going ang amoang investigation kung kaning ba gyud gihapon mga grupoha nga mga batan-on ang na-involved ato kay ang isa among gitan-aw man gud nga motive basin personal grudge, kining gang war or love triangle kay naa may babaye nga naapil so mao na amoang possible motive gitan-aw,” sigon ni Major Gingoyon.
Base sa CCTV footage nga nakuha sa Liloan Police Station, lima ka motorsiklo ang nakit-an nila nga nihimo sa maong pagpamusil.
“Amoa na gi-assume nga mao to sila, kuyog to sila kay nagdunganay man sila og paingon sa area unya nagdunganay sad sila og pahawa,” ni Gingoyon pa.
Na-recover sa kapulisan ang 18 ka kabhang sa wala pa matino nga calibre nga armas sa crime scene.
Ang kapolisan aduna nay tulo ka mga tawong gikonsiderar nilang Persons of Interest nga gituohang may kalabotan sa maong pagpamusil sa grupo sa mga batan-on. (BANAT NEWS)