CEBU, Philippines — Nasakmit sa Lapu-Lapu City Police Office (LCPO) ang 147.53 ka gramo nga shabu nga nikantidad ngadto sa P1,003,204 gikan sa 15 ka pusher lakip niini duha ka high value individual sulod sa usa ka semana nilang operasyon nga nagsugod niadtong Abril 7 hangtod sa Abril 13, 2024.
Atol sa press briefing nga gipahigayon, si Police Colonel Ali Baron, officer-in-charge sa LCPO nagkanayon nga ang pagkasikop sa mga suspetsado resulta kini sa hiniusang operasyon sa lima ka presinto ug sa mga sakop sa City Drug Enforcement Unit (CDEU) ug City Intelligence Unit (CIU) sa LCPO.
Matud ni Baron nga ang duha ka HVI mohalin kini og 100 ka gramo nga shabu matag semana.
Ang mga suspetsado kasamtangan karon nga natanggong sa Lapu-Lapu detention cell sa LCPO.
Sa laing bahin, sikop ang duha ka indibidwal nga nalambigit sa ilegal nga sugal atol sa operasyon sa Bogo City Police Station ug Regional Intelligence Division (RID) sa Police Regional Office-7 diha sa managlahi nga dapit sa Probinsiya sa Sugbo niadtong Martes.
Unang nadakpan si Lito Villamor Ylanan, 47-anyos, taga Purok Diego Silang, Barangay Cayang, Dakbayan sa Bogo kinsa nalabigit sa ilegal nga swertres.
Nakuha gikan kaniya ang usa ka bundle stub nga adunay nagkalain-laing number combinations sa swertres, usa ka black ballpen, P50 nga pusta, P950 nga halin sa sugal ug carbon paper.
Samtang sunod nga nadakpan si Odelon Ca a alyas Odelon diha sa Sitio Molave, Barangay Tabunok, Dakbayan sa Talisay kinsa nalambigit gihapon sa ilegal nga swertres.
Nakuha gikan niya ang usa ka ballpen, bundle tally sheet nga adunay nagkalain-laing number combination, duha ka pahina sa tally sheet, ug P2,000 nga kwarta nga gituohang halin. (BANAT NEWS)