CCPO: Aduna nay imbestigador nga motabang sa 11 ka police stations

CEBU, Philippines — Aduna nay motabang sa mga imbestigador sa 11 ka police stations sa Cebu City Police Office (CCPO) diin opisyal na nga ilusad karong adlawa ang supporting units nga motutok sa crime against person ug crime against property.

Si Police Lieutenant Colonel Janette Rafter, deputy city director for operations sa Cebu City Police Office nagkanayon nga proyekto ni Police Colonel Ireneo Dalogdog, direktor sa CCPO ang pag-umol sa maong mga supporting unit.

Gitinguha sa CCPO nga mas paspas ang pagsulbad sa mga krimen nga mahitabo sa siyudad tungod kay anaa nay mga polis nga mosuporta sa mga police station aron matutokan ang sa kaso.

Ang sitwasyon karon sa mga police station mao nga dili lang pag-imbestigar sa usa ka kaso ang ilang trabaho hinungdan nga malangay ang pagsulbad sa kaso tungod kay kong dunay laing panghitabo nga motumaw mabalhin na usab ang focus sa mga imbestigador.

Nasayran nga kasagarang krimen sa Siyudad sa Sugbo mao ang mga insidente sa pagpamusil, pagpangawat ug pagpanulis. Giklaro ni Rafter nga ang police station gihapon ang magsilbing frontline sa pag- imbestigar sa kaso ug ang supporting units nga giumol maoy mosuporta aron dili na sama kaniadto nga kinahanglan pa manguha og mga tawo sa mga police station aron motabang sa imbestigasyon.

“Motabang ni sila but still the frontline of all cases is the station gyud gihapon kong asa nahitabo ang krimen”, ni Rafter pa.  Ang matag supporting units gilangkuban og tag usa ka team nga adunay pito ka police personnel nga graduate og investigation course.

“This is still a work in progress, daghan pa ang plantsahonon, mao gyud ang project ni CD gusto gyud niya a team nga motutok gyud sa panghitabo”, dugang ni Rafter. BDB BANAT NEWS