75 ka buses nahatagan og SP alang sa Semana Santa

CEBU, Philippines — Si Eduardo Montealto, Jr., direktor sa Land Transportation Franchising and Regulatory Board-7 nibutyag nga 75 ka units sa buses ang ilang nahatagan og special permits alang sa panahon sa pagsaulog sa Semana Santa.

Matud ni Montealto nga ang coverage sa maong SP nga ilang gihatag nagsugod niadtong Marso 22, 2024 ug mahuman kini hangtud sa Abril 14, 2024.

Nasayran nga 45 ka units alang sa south ug 30 alang sa north ang nahatagan og SP.

Gibutyag ni Montealto nga ang Land Transportation Office Central Visayas ug Highway Patrol Group maoy nag-take charge sa enforcement ug pagpatuman sa balaod ilabi na sa mga malapason ug sila usab ang mag-impound.

Dugang ni Montealto nga kadtong mga malapason nga masakpan sa LTO ug HPG iduso kini sa buhatan sa LTFRB-7 alang sa adjudication.

Sa laing bahin, gibana-banang moabot sa 100,000 ka pasahero ang modagsa sa Cebu South Bus Terminal ug Cebu North Bus Terminal (CNBT) karong panahon sa Semana Santa.

Ug gumikan niini, dugang mga bus ang gisaad sa management sa duha ka terminal ug sa mga kompaniya sa bus nga ipadala aron masiguro nga mahatud ang mga pasahero sa ilang tagsa-tagsa ka destinasyon.

Si Rodenits Esgana, manager sa duha ka terminal nga gidumala sa Kapitolyo nagkanayon nga ilang giandam daan ang mga terminal gikan sa seguridad nga gipatuman sa sulod ug ang pagpahan-ay sa pagpasakay sa mga pasahero. Si Gobernador Gwendolyn Garcia nisusi sa CSBT kagahapon diin gihulagway niini nga han-ay ang operasyon sa sulod sa terminal.

Apan matud ni Garcia nga daghan pa ang angay nga palambuon sa CBST sama sa mga pansayan diin ang mga tawo mangita kini og komportable ug limpiyo nga pansayan. Rowena D. Capistrano, Le Phyllis F. Antojado/BDB (BANAT NEWS)