PRO-7, BFP-7 alerto sa Semana Santa

CEBU, Philippines — Gibutang na sa heightened alert ang Police Regional Office (PRO)-7 subay sa pagtimaan sa Semana Santa sigon pa ni Police Lieutenant Colonel Gerard Ace Pelare, tigpamaba ni PRO-7 Regional Director Brigadier General Anthony Aberin.

Nagkanayon si Pelare nga ang ilang skeletal deployment nagsugod sa miaging weekend aron magbantay sa mga terminals, pantalan ug tugpahanan lakip sab sa mga mga kalihukan sa simbahan tungod sa Semana Santa.

Karong adlawa, dugangan pwersa sa kapulisan aron sa dili pa ang Huwebes Santo kompleto na ang mga personnel nga ipakatap.

 “We are now ready, we would like to assure the public, the population of Region Seven that your Police Regional Office-7  is now ready to deliver a very safe and secured Semana Santa 2024,” matud ni Pelare.

Magpadala og pwersa ang Regional Mobile Force Battalion sa ubang lugar sa rehiyon sama sa Bohol ug Negros Oriental aron mabantayan gyud ang mga lugar nga dunay mga kalihukan.

Sa pikas bahin, gibutang sa Bureau of Fire Protection Central Visayas ang tanang mga sakop sa code blue o heightened alert sugod sa nilabay nga adlaw hangtud kagahapon adlaw nga Martes, Marso 26, 2024 ug gikatakdang ipasaka pa kini hangtud red alert sugod karong adlawa.  Ang kabomberohan niawhag sa katawhan ilabi na kadtong mobiya sa ilang mga panimalay nga siguraduhong giibot tanang appliances ug gipawong ang plangka aron paglikay sa sunog.

Karon adlawa wala nay tugotang mga personnel nga maka leave o makabiya sa ilang trabaho.

Si Mayor Michael Rama sa Dakbayan sa Sugbo niawhag sa mga Sugbuanon nga mamalandong ning panahuna.Giawhag sab niya ang tanan pagsalmot sa Visita Iglesia ug ang Station of the Cross.

Ang kagamhanan  sa dakbayan mopahigayon usab gihapon sa Buhing Kalbaryo karong Biyernes Santo nga magsugod gikan sa Barangay San Nicolas Proper ngadto na sa V.Rama ug sa Espina Compound sa Barangay Guadalupe ning Dakbayan sa Sugbo. –  IBM BANAT NEWS