300 ka polis ipakatap sa Semana Santa, tourist destinations sirado

CEBU, Philippines — Aron masiguro nga hapsay ug malinawon ang pag-obserbar sa Semana Santa ang Cebu City Police Office (CCPO) mopakatap og 300 ka police personnel diha sa nagkalain-laing simbahan ug ubang lugar nga dugokan og mga tawo sugod karong Miyerkules.

Matud ni Police Lieutenant Colonel Janette Rafter, deputy city director for operations sa CCPO nga naka-identify sila og 33 ka simbahan sa Cebu City nga ilahang bantayan karong Semana Santa.

Ang security nga ilang ihatag magdepende kini apan dili mawala ang Police Assistance Desk (PADS) ug ang mga polis nga magbantay sa sulod ug gawas simbahan.

Giklaro ni Rafter nga kadtong mga polis nga na-assign sa beat patrol ug Tactical Motor Riding Unit (TMRU) wala gitandog.

Matud ni Rafter nga ang mga police personnel nga naghimo og admin duties sa headquarters sa CCPO ipagawas ug i-deploy sa mga simbahan hinungdan nga sa pagkakaron wala una sila nangayo og augmentation sa Police Regional Office (PRO)-7.

Magpadayon ang naandan nga trabaho sa CCPO sama sa pagpatuman sa law enforcement operations batok sa nagkalain-laing matang sa krimen sama sa ilegal nga drugas, ilegal nga sugal, loose firearms, wanted person ug uban pa.

Si Rafter nagkanayon nga kadtong mga magpabadlong huna-hunaon una nila ang ilang buhaton tungod kay magpundo sila og dugay sulod sa prisohan gumikan kay taas ang bakasyon.

“Sa mga magpabadlong diha paghuna-huna gyud mo daan kay mora’g mag-Semana Santa gyud mo sa mga estasyon, sige lang naa man pod benignit ang mga polis”, ni Rafter pa.

Nakig-alayon usab ang CCPO sa mga Barangay Public Safety Officers ug sa mga force multplier aron tabangan ang kapolisan sa pagbantay sa mga kabalayan diin ang mga tag-iya mouli sa ilang mga probinsiya aron dili mabiktima sa mga badlongon sa katilingban sama sa mga kawatan.

Awhag usab sa kapolisan sa mga manguli nga kon mahimo adunay mahibilin sa balay apan kong dili gyud kalikayan seguradohon nga natangtang ang tanang appliances gikan outlet ug ipaniguro nga sirado ang balay nga dili masudlan og mga badlongon.

Subay sa kalihokan sa Biyernes Santo pipila ka mga tourist destination sa Lungsod sa Aloguinsan ang tak-opan ug mobukas kini pagbalik sa Sabado de Gloria.

Karong Marso 29, 2024 ang Hermits Cove bukas lang kini siya gikan sa alas 8:00 sa buntag ngadto sa alas 2:00 sa hapon ug moabli kini pagbalik sa adlaw nga Domingo, Marso 30, 2024.

Samtang ang Bojo River Cruise sirado kini sa Biyernes Santo ug mobukas pagbalik sa adlaw nga Sabado. (BANAT NEWS)