53 ka pamilya nga maapektohan sa demolisyon nanghangyo

CEBU, Philippines — Ang konseho sa Dakbayan sa Sugbo nipasar og resolusyon nga naghangyo sa Office of the City Mayor nga makigsabot sa mga tag-iya sa luna sa Sitio Gemelina, Barangay Quiot diin 53 ka pamilya ang apektado sa umaabot nga demolisyon.

Niadtong Miyerkules, usa ka suwat nga gipirmahan sa presidente sa Gemelina Hills Urban Poor Association nga si Corazon Susas ang gi-endorso ngadto sa konseho diin naghuwat kini og aksyon sa executive department.

Niadtong Disyembre 14, 2023 ang grupo nakasumiter na kini og susamang suwat nga naghangyo kabahin sa isyu sa 53 ka pamilya diha sa nahisgutang lugar nga mawad-an sa ilang kapuy-an.

“As mentioned in the letter, a Writ of Demolition has already been served, and we have asked from your good office ample time to settle things and have humbly asked for assistance as well as a relocation site”, tipik sa suwat.

Si Konsehal Jocelyn Pesquera niduso og corollary motion sa pagtugyan sa suwat ngadto sa Division for the Welfare of the Urban Poor (DWUP).

Si Konsehal Nestor Archival, Sr. niduso usab kini og corollary motion nga naghangyo usab kang Cebu City Mayor Michael Rama sa pagpaminaw sa mga apektadong pamilya nga maapektohan sa demolisyon.  Ang maong duha sa corollary motion ang giaprobahan sa konseho sa siyudad. — /BDB (BANAT NEWS)