Pagkanselar sa tax declaration gituki sa konseho sa siyudad

CEBU, Philippines — Pipila ka mga isyu nga nagpalibot sa Cebu City Assessor's Office ang nahisgotan atol sa regular session sa konseho, ilabi na sa kanselasyon sa tax declaration ug ang kalangay sa proseso niini.

Adunay suwat sa mga reklamo nga gi-endorso sa konseho ang nahisgotan sa regular session niadtong Miyerkules, Marso 20, 2024.

Gipirmahan kini ni Teresita Corazon Baronda nga gi endorso sa konseho nga naghangyo og giya kung unsaon ang proseso sa ilang application sa cancellation sa Tax Declarations sa mga building nga gipanag-iya ni Salud Borromeo nga kasamtangang giila isip "for auction" sa dakbayan.

Ila hinoon gitataw nga ang maong mga building giguba na kapin sa 20 ka tuig na ang milabay.

Mihangyo na sab ang konseho ngadto sa City Assessor sa pagpahigayon og inspeksyon sa mga luna ug pagsumitir og report sud sa 30 ka adlaw.

Atol sa diskurso, si Konsehal Nestor Archival Sr. miisa og corollary motion nga naghangyo sa City Assessor's Office, city Treasurer's Office ug sa mga representante sa foundation alang sa usa ka executive session aron sa pagtuki sa problema ug pagpangita og solusyon aron di na masubli ang insidente.

Si Konsehal Jocelyn Pesquera ang Majority Floor Leader nagkanayon nga gi-auction na ang mga luna ug wa pa kini makuha sa mga pamilya ug mamahimo na kining luna sa city government.

Dugang ni Pesquera, mao ni ang hinungdan ngano adunay tax declaration bisan kung gidemolished na.

Matud ni Archival, pipila ka mga tawo ang midangop sa ilang opisina kabahin sa susamang sitwasyon.

"Naay mga nahitabo man gud na atong mga contituents, naa silay balay unya sometimes naay mga naigo sa bagyo unya nangatumba na, nya sige gihapon patak ang taxes," matud ni Archival.

Dugang niya adunay mga higayon nga ang susamang luna nahalin ug gipanag-iya og laing indibidwal ug adunay mga kwestyonableng dokumento.

Nagkanayon si Pesquera nga nagpahigayon na og inspeksyon ang City Assessor's Office sa mga nakalista alang sa auction. Giklaro sab niya nga ang tax di na modako tungod ang mga luna gipanag-iya na sa City Government ug aduna na kini exemption sa property taxation.

Nagkanayon sab si Konsehal Noel Wenceslao nga ang mga tag-iya sa luna nga giguba sa sunog kinahanglang mopahibawo sa City Assessor's Office aron mapaubos og inspeksyon ug makanselar ang tax declaration.

Matud ni Archival, ang susamang problema nga iyang nakita sa kadaghanan sa mga constituent, wa mapahibawo sa proseso. — /MEL (BANAT NEWS)