Mga mananagat sa Talibon nakadawat og mga pump boat

CEBU, Philippines — Nakadawat og mga fiberglass pump boat ang mga mananagat sa lungsod sa Talibon pinaagi sa pag abag sa kagamhanan sa Probinsya sa Bohol ug ubang ahensya sa gobyerno.

Si Bohol Governor Erico Aristotle Aumentado mao ang personal nga mi apod apod niini ngadto sa Talibon Fisherfolks.

Ang gubernador nalipay nga nipadangat sa iyang suporta ngadto sa mga mananagat sa Lungsod sa Talibon pinaagi sa Office of the Provincial Agriculturist.

Sumala pa ni Aumentado, malampuson nila napahigayon ang ceremonial turn-over sa mga pumpboats ngadto sa mga mananagat nga gihimo sa Talibon Port.

Ang gubernador nitug-an nga gusto niyang matabangan sa ilang panginabuhian ang mananagat aron makatabang kini sa pagmintinar sa tukma nga presyo sa kamerkadohan aron dili na sila magsalig sa mga middle men.

Gibutyag ni Aumentado adunay 15 ka mga fabricated fiber glass pumpboat nga 22 footer gikan sa Office of the Provincial Agriculturist ug 5 ka mga 16 footer pumpboat gikan sa Bureau of Fisheries and Aquatic Resources ang giapod-apod. — /MEL (BANAT NEWS)