Bodega sa plastik nasunog

CEBU, Philippines — Nimugna og kahadlok sa mga molupyo  ang pagkasunog sa usa ka bodega sa mga basurang plastik nga nahimutang sa White Road, Barangay Inayawan, Syudad sa Sugbo kagahapon sa udto.

Si Marinette Palacio, usa sa mga residente sa lugar nagkanayon nga ang lugar labayanan og basura kaniadto. Apan bisan og dili na kini tambakanan, naa pa gihapoy mga nahibiling mga basura ilabi na ang mga plastic diha sa palibot.

Duna say mga higayon nga matud pa dunay magsunog og mga scraps nga electric wires sa lugar.

Nagduda siya nga sa dihang nagsunog sila sa wire ang aligato nitugpa sa nagtapok nga plastik hinungdan sa pag-ulbo sa kalayo.

Sa pagsuwat ning balita, nabalaka si Palacio nga mokatap ang kalayo sa gawas sa maong bodega ug motapon sa kabalayan sa palibot niini.

Iyang gibana-bana nga naa sa 144 ka panimalay ang naa sa dapit nga mga miyembro sa urban poor.

Gawas sa peligro sa sunog, dunay mga kabalaka nga dunay dautang epekto sa panglawas sa mga residente ang maong sunog tungod sa mga plastic nga nasunog.

Matud pa ni Palacio nga napawong na unta ang kalayo apan nikalit kini pagbalik sa pagtuo nga nag umido pa diay kini sa ilawom.

Naobserbarhan nga naglisod ang kabumberohan sa pagpawong sa kalayo tungod kay tinapok nga plastik ang naa sa bodega.

Sa pikas bahin, giandam na sa kagamhanan sa Dakbayan sa Mandaue ang temporaryong kapuy-an sa mga pamilyang nasunogan sa duha ka mga sitio  sa Barangay Looc sa Siyudad sa Mandaue.

Ang luna sa Sitio Riverside duol sa University of Cebu Lapu-Lapu and Mandaue (UCLM) giugmad alang sa pagpatukod og mga temporaryong kapuy-an sa mga nasunogan sa Sitio UTB (Under th Bridge) ug Sitio Bantayan sa Hari sa Barangay Looc sa maong siyudad.

Si Looc Barangay Captain Raul Kevin Cabahug miingon nga ilang gitinguha ang paghuman sa katukoran sa mga panimalay sa sunod semana.

Sa nasayran ang 515 ka mga pamilya nga naepektohan sa maong sunog sa UTB ug temporary silang gipapasilong sa Barangay Gymnasium ug Cesar Cabahug Elementary School, tungob sab niinia temporaryong gisuspenso ang klase sa mga tinun-an niini. Gipahibalo sab nga dili na makatukod og balik ang mga nasunogan sa maong lugar tungod kay nahimutang man kini sa danger zone area.  IBM BANAT NEWS