CCPO mangayo og dugang polis alang sa Semana Santa

CEBU, Philippines — Gitun-an karon sa Cebu City Police Office (CCPO) nga mangayo og dugang police personnel sa Police Regional Office (PRO)-7 nga motabang sa pagbantay sa seguridad sa Semana Santa sa sunod semana.

Giklaro ni Police Lieutenant Colonel Janette Rafter, Deputy City Director for Operations sa Cebu City Police Office nga duna sila'y igong PNP personnel aron mobantay sa seguridad apan aron dili makuha ang mga polis nga gipakatap sa kadalanan mas mayo nga madugangan ang pwersa aron ipakatap sa mga simbahan ug ubang dapit sa Cebu City nga dagsaon og daghang tawo panahon sa Semana Santa.  Napaabot na kini ni Rafter sa ilang operations officer nga si Lieutenant Colonel Danilo Yema aron isugyot kini kang Police Colonel Ireneo Dalogdog, director sa CCPO.

"Among nasabutan nga i-recommend namo kay CD is 50, dako na kaayo na siya kay intended lang man gud sa mga simbahan lang gyud ba while we have a standard security package for the churches kanang basic nato like the PADS and then we also have the perimeter security", ni Rafter pa.

Gawas sa mga simbahan apil usab nga bantayan sa kapolisan ang mga bus terminal ug pantalan.

Diha sa Cebu South Bus Terminal adunay polis nga ipakatap sa gawas aron masiguro nga walay mga pasahero nga anha sa gawas ra magpaabot og kasakyan imbes moadto sa sulod sa terminal nga makabalda na hinoon sa dagan sa trapiko ilabi na nga nagpadayon ang pagtrabaho sa Cebu Bus Rapid Transit sa dapit.

Magbutang sab ang CCPO og Police Assistance Desks (PADS) sa kadalanan aron maduol sa mga tawo nga adunay pangutana o emerhensiya.

Panahon sa Semana Santa dagsaon sa mga tawo ang Carbon Public Market tungod kay mamalit og sagol sa benignit ug uban pa maong dugangan og polis ang lugar aron hapsay, malinawon ug walay krimen nga mahitabo sa merkado.

Apil usab gipangandaman sa kapolisan sa Siyudad sa Sugbo ang Buhing Kalbaryo mahitabo sa Biyernes Santo ug gipasiugdahan ni Mayor Michael Rama. (BANAT NEWS)