Range 999 mag-atubang og duha ka kaso

CEBU, Philippines — Giandam na sa Cebu City Police Office (CCPO) ang kasong frustrated murder ug illegal possession of firearms nga ipasaka batok kang Jed Andrew Salera o mas naila nga Range 999.

Si Range 999 maoy mipusil sa 37-anyos nga American national  gawas sa usa ka club sa Barangay Lahug, siyudad sa Sugbo pagka Domingo sa buntag kinsa ning tungura padayon pang nagpaalim sa tambalanan human makaangkon og samad pinusilan sa abaga ug paa.

Ang amahan ni Range 999 nga si Andres  Romagera, 58, miduaw sa iyahang anak sa Mabolo Police Station kun asa kini karon nabilanggo ug miingon alas 9 sa buntag sa adlaw'ng Domingo didto sa Lungsod sa Argao nasayod siya sa nahitabo sa iyahang anak.

Dihang nasayod siya nga nakasala ang iyang anak wala matod pa siya kasabot sa iyahang gibati, nakalitan ug naluya ang amahan.

Pag-udto sa adlaw'ng Domingo mibiyahe siya paingon Cebu City aron susihon ang anak sa police station.  "Gisulti niya nako nga ayaw lang mo kaguol, mangayo ko’g pasaylo nga nakabuhat ko ana... Wala lang sad ko mangutana og nganong nabuhat to niya kay bag-o paman gud kaayo ang panghitabo," sigon sa amahan ni Range 999.

Gihulagway sa amahan nga sa bata pa si Range giingong putongon na kini daan ug nagdala na niya hangtod nga nagdako. Mahilig gyud kini maghimo og kanta.

Si Range matod pa ang ang nagsuporta sa panginahanglanon sa ilang pamilya.  Mensahe sa amahan sa pamilya sa nasad-an ni Range mao ang pagpangayo og pasaylo sa nahitabo.

Si Range 999 sa iyang bahin miingon iyahang gisalig sa Labaw nga Makagagahom ang iyang kaugmaon.

"Bisag ingon ani ni kanipis (iyahang bukton) gikaya nako para nilang tanan, para man ni nila tanan gibuhat nako, sa music career, grabe struggle kung alam niyo lang," ni Range 999 pa. (BANAT NEWS)