Mga ilegalista sikop atol sa operasyon sa NBI

CEBU, Philippines — Nadakpan sa managkalahing operasyon sa mga sakop sa National Bureau of Investigation Cebu District Office ang walo ka tawo nga nagpasiugda og ilegal nga kalihokan.

Naglakip sa mga ilegal nga kalihokan nga gikalambigitan sa mga dinakpan mao ang pagpadagan og ilegal nga Small Town Lottery (STL) ug pagbaligya og fake nga butane canister.

Naglakip sa lima nga mga nadakpan nga giligar nagbaligya og fake nga STL tickets nga nagdala  sa pangalan nga King Dragon Gaming and Amusement Corporation mao sila si Anna Fe Pedida, Elenita Madelo, Jerome Buot, Jeza Pasaol ug Arando Booc, pulos hngkod ang panuigon, mga residente sa Siyudad sa Danao.

Ang NBI nipahigayon og entrapment operation batok sa mga suspetsado sa Siyudad sa Danao ug ingon man gipahgayon usab ang bet-bust sa Lungsod sa San Remegio.

Si Arnel Pura sa NBI -Cebdo Mandaue agent-in-charge nagkanayon nga ang lima ka nadakpan ang gialigar nga nagpasiugda kini og STL nga maoy gigamit ang fake King Dragon STL tickets.

Gituohan nga ang mga nadakpan maoy downlines ni Libradilla Baring nga una na nga nadakpan sa gipahigayon nga entrapment operation niadtong Pebrero 28, 2024.

Nasayran ang King Dragon maoy authorized agent corporation nga gitugotan  sa ilang operasyon sa Philippine Charity Sweepstakes Office (PCSO) sa STL diin nagbase kini sa ilang opersyon sa SL Technopark  sa Barangay  Gabi sa Lungsod  sa Cordova.

Samtang sa laing operasyon nadakpan sila si Cecilio Gilig, Sarah Jane Altariba ug Victoria Gilig, pulos hingkod ang panuigon nga namaligya og fake nga butane canister nga nagdala usab sa pangalan nga Cebu Rufanes Multigas Corporation and Servicial LPG Corporation.

Matud ni Pura nga nangayo og tabang kanila ang Rufance and Servicial nga nialigar nga ang maong mga suspetsado ang nalambigit sa trademark infringement and unfair competition sa pagbaligya og fake nga produkto.

Sa gihimo nilang pakisusi ilang nasuta nga ang tulo nagpasiugda sa pagbaligya og fake nga mga produkto sa butane canister sa Isla sa Olango.