P17 milyong shabu nakasamit sa buy-bust operation sa CCPO

CEBU, Philippines — Niabot ngadto sa kapin sa P17 milyones nga balor sa ilegal nga drugas ang nasakmit sa kapolisan sa Cebu City Police Office (CCPO) sa ilang buy-bust operation sa managlahi nga lugar sa Siyudad sa Sugbo.

Duha ka suspetsadong durugista ang nasikop atol sa buy-bust operation sa City Intelligence Unit sa Cebu City Police Office (CCPO) ug nakuhaan og binulto sa ilegal nga drugas diha sa Purok 8, Barangay Kamputhaw, Siyudad sa Sugbo niadtong Martes sa gabii. Ang mga suspetsado mao sila si Ryan Sususco Balansag alyas “Insek”, 32-anyos nga giingong bodegero sa ilegal nga drugas ug Marlon Jabonero Lopez alyas “Marlon”, 42-nyos, parehong residente sa maong lugar.

Nasakmit sa kapolisan gikan sa mga suspetsado ang 2,000 gramong shabu nga nikantidad tanan ngadto sa P13.6 milyones.

Giingong si Balansag maka-dispose kini og tulo ngadto sa lima ka kilo nga ilegal nga drugas.

Nasikop usab atol sa buy-bust operation sa Station Drug Enforcement Unit sa Mambaling Police Station niadtong Martes sa gabii ang usa ka high value individual diha sa Sitio Puntod, Barangay Mambaling, Siyudad sa Sugbo.

Ang suspetsado mao si Joel Laogico Ocarol Jr., alyas “Ondong”, 22-anyos, residente sa Sitio Conception, Barangay Pasil, Siyudad sa Sugbo.

Nasakmit gikan sa suspetsado ang 508 gramo nga shabu nga nagkantidad ngadto sa P3.4 milyones.

Samtang tulo ka tawo sikop apil na niini ang usa ka Russian national ang nasikop sa buy-bust nga gipahigayon sa Philippine Drug Enforcement Agency Bohol Provincial Office uban sa BPPO PDEU, Bohol Maritime Police Station ug Loon Municipal Police Station didto sa Purok 6, Barangay Basdio, Loon Bohol, niadtong Martes sa hapon ug gibungkag usab sa kapolisan ang drug den.

Nasikop ang subject sa buy-bust ug tigmentinar sa drug den nga si Cesar Bangco, 36, construction painter ug plea bargainer, Viktor Tutov, 38, Russian national, walay trabaho, lakip usab ang parokyano nga si Chun Jen Panis, 33, construction painter.

Nasakmit gikan sa suspetsado ang 12 gramong shabu nga nibalor ngadto sa P240 mil, buy-bust money, mga ID ug kagamitan sa pagamit sa ginadili nga drugas.

Sa Dakbayan sa Mandaue, usa ka 35-anyos nga inahan ang nadakpan sa mga sakop sa City Drug Enforcement Unit sa Mandaue City Police Office atol sa buy- bust operation diha sa dalan M. Logarta, Barangay Subangdaku, Siyudad sa  Mandaue sa niaging gabii.

Nasakmit gikan sa suspetsado ang upat ka gramong shabu nga nikantidad tanan ngadto sa P27 mil.

Sa Dakbayan sa Talisay usa ka 27-anyos ang nasakmitan og ilegal nga drugas niadtong Martes sa gabii diha sa Barangay Lawaan 2, Dakbayan sa Talisay.

Ang nasikop mao si Jose Marito Cabreroa Labra, lumad nga taga Barangay Inayawan, Siyudad sa Sugbo ug kasamtangan nga nagpuyo sa nahisgutang lugar.

 Nasakmit gikan sa suspetsado ang 25 gramong shabu nga nikantidad ngadto sa P170 mil. — Romeo D. Marantal, Rowena D. Capistrano, Romeo T. Limpangog, Gabriel C. Bonjo  (BANAT NEWS)