Maguwang gipatay sa manghod

CEBU, Philippines — Gumikan sa away sa balay gidunggab patay sa manghod ang iyahang maguwang nga nahitabo diha ra sab sa ilang tugkaran sulod sa Visayas Command, Barangay Apas, siyudad sa Sugbo alas-11 sa buntag kagahapon.

Ang biktima mao si Roberto Astillo, 65, samtang ang suspek mao ang igsuon niining si Francisco Astillo, ang duha pulos ulitawo ug residente sa naasoy nga lugar. Nasayran nga tupad ra og balay ang biktima ug suspek. Matud ni Police Major Romeo Caacoy Jr., hepe sa Mabolo Police Station sa Cebu City Police Office (CCPO) base sa ilang imbestigasyon personal nga kasuko ang nagtukmod sa manghod sa pagdunggab sa iyahang maguwang. Kini tungod kay nasuko kini nga kuhaon matod sa iyahang maguwang ang iyahang hinaguan nga balay.

Gumikan sa kalagot gisulod sa suspek ang balay sa maguwang ug iyaha kining gidunggab sa liog nga maoy hinungdan sa kamatayon niini.

Nasuta nga sa wala pa nahitabo ang pagpanunggab giingong naglalis ang duha niuli matod pa ang suspek unya nigawas ug usab ug gadala na og  kutsilyo nga maoy gigamit pagdunggab.

Gatapad ra gud ni sila, kani sila puro ni sila ulitawong guwang, unya base sa iyahang alegasyon kaning iyang igsuon kuhaon kuno ang iyahang balay unya galagot siya nikuha siya og kutsilyo mao iyahang gikasuk-an,  ni Caacoy pa.

Kausa ra matod pa gidunggab sa suspek ang iyahang maguwang ug narekober sab sa kapulisan ang kutsilyo nga gigamit pagdunggab.

Human mahimo ang krimen mitahan ra sab dayon ang suspek sa kapulisan. (BANAT NEWS)