Mga scholars sa Argao nakadawat og tabang pinansyal
CEBU, Philippines — Mokabat sa 132 ka mga scholars ubos sa Expanded Argao Tertiary Education Scholarship Assistance Program (E-ATESAP) ang natagaan na sa ilang mga cash assistance niadtong Sabado, Pebrero 10, 2024.
Ang matag usa ka estudyante nakadawat og 5,000 pesos gikan sa lokal nga kagamhanan sa Argao pinaagi sa E-ATESAP nga programa alang sa Academic Year 2023-2024. Si Hon. Atty. Jonathan Villegas, chairman sa Committee on Education sa Argao mao ang nangu sa pag apod-apod sa maong cash assistance ngadto sa mga kwalipikadong nakapasar sa E-ATESAP inubanan ni Executive Assistant of Educational Affairs Mr. Joseph Rivera, ug Disbursing Officer Mrs. Nestora Gelbero. Nanghinaot si Villegas nga magpabiling matinud-anon ang mga estudyante sa ilang mga grado ug dili manglimbong sa ilang isig ka tinun-an, magbaton og maayong gawi nga madala nila sa panahon nga sila mahimo nang mga propesyonal.
"hinaot dili ninyo gastohon pag pamista sa Dalaguete ang kwarta, o dili ba hutdon inig abot sa Valentine`s Day. Hinaot inyo kining gamiton alang gayud sa pagkab-ot sa insaktong edukasyon aron kamo magmalampuson!" matud pa ni Atty. Villegas. Samtang ang lokal nga kagamhanan sa lungsod sa Argao masaligon nga ang gihatag nga cash assistance alang sa mga scholars makatabang sa ilang pageskwela. Niadtong buwan sa Enero, 40 ka mga scholars ang nakadawat og cash assistance gikan usab sa E-ATESAP.
Ang E-ATESAP pipila lamang sa programa ni Mayor Allan Sesaldo alang sa mga tinun-an a Lungsod sa Argao. — /MEL (BANAT NEWS)
- Latest
