Daghang contingents sa Cebu City ang mosalmot sa Sinulog sa Carmen
CEBU, Philippines — Gipaabot nga daghang contingents gikan sa Cebu City ang mosalmot sa Sinulog sa Carmen karong adlawa, Enero 28,2024 nga dakong kalainan sa nakalabay nga tuig nga diin kadaghanan sa mga nangapil pulos lamang tanan gikan sa mga kalungsoran sa probinsya sa Sugbu.
Ang mga taga Cebu City nga moapil karong adlawa anha mokompetisyon sa open category. Sa pagkakaron duna lamang walo ka mga contingents ang makigsangka sa maong kategoriya, ang pito niini pulos taga Cebu City samtang ang usa ang defending champion nga Carcar City. Walay matud pa free interpretation o Sinulog-based categories karong tuiga sa Sinulog sa Carmen.
Niadtong nakalabay nga Sinulog sa Kabataan sa Lalawigan niadtong Enero 14, ang Carcar maoy nahimong kampeyon sa ritual showdown. Makigtigi sila karong adlawa sa mga contingents gikan sa Cebu City sama sa Banauan Cultural Group sa Barangay Guadalupe nga maoy nahimong kampeyon sa Sinulog sa Kabataan sa Dakbayan niadtong Enero 13, ug Sinulog sa Sugbu 2024 ritual showdown pag Enero 21; ang Tribu Mabolokon, Tribu Masadyaong Subanian, Tribu Aktibong Binaliwhanon, Banay San Nicolasnon, Banay Labangon, ug ang premyadong Lumad Basakanon.
Dili na sab bagito ang Banauan sa Sinulog sa Carmen tungod kay ikaupat na nila kining higayon nga nisalmot sa maong lungsod.
Si Barangay Councilor kinsa mao sab ang head choreographer sa Banauan nga si Cliff Yunson Racuya mibutyag nga madaog man o dili, may premyo man o wala, ilahang ihatag ang tanan paghalad ngadto kang Senyor Sto. Niño.
Gipaabot sab nga mamawi ang beteranong grupo nga Lumad Basakanon karong adlawa human sila napakyas sa free interpretation category sa miaging mga Sinulog sa Carmen.
Sa local category dunay pito ka pundok nga taga Carmen ang magtigi sama sa defending ritual showdown champion Tribu San Roque. Gipaabot sab nga dili magpalupig ang Tribu Luyanganon, Tribu Reglas, Tribu Bagho Cultural Troupe, Pubdok sa Nagkahiusang Cortehanon, Tribu Ipilacion ug Tribu Panaghiusa. (BANAT BALITA)
- Latest
