Dugang polis gipuno sa pwersa sa Cebu City para sa Pista Senyor

CEBU, Philippines — Gipadad-an og dugang polis ang Cebu City Police Office (CCPO) aron motabang pagbantay sa seguridad sa mga kalihukan sa Sinulog 2024 ilabi na karong adlawa, Biyernes, Enero 19, 2024.

Ang mjaong mga polis i-deploy karong adlawa aron mobantay sa himuong Walk with Mary ug sundan sa Traslacion gikan sa Basilica Minore del Sto. Niño paingon sa National Shrine of Saint Joseph sa dakbayan sa Mandaue.

Moabot sa 442 ka mga polis nga nag-schooling sa Regional Training Center (RTC)-7 diha sa Lungsod sa Consolacion ug kapin sa 300 ka mga polis gikan sa Regional Mobile Force Battalion (RMFB)-7 ang gipadala para motabang.

Gipakigsultihan sila ni CCPO Director Colonel Ireneo Dalogdog ug gipahinumduman gyud sila sa angayang buhaton ilabi na kun ma-deploy sama sa saktong pagsul-ob sa uniform, maabi-abihon sa mga tawo, patas-an ang pasensiya ug labaw sa tanan dili magduwa sa cellphone kun naka duty aron dili malabay sa layo nga lugar.

Kahinumduman nga dunay polis nga na-augment sa Sinulog ang nasakpan nga nagduwa sa cellphone ug gipalabay sa layo nga lugar ni Police Regional Office-7 Director Brigadier General Anthony Aberin.

Daan ng dunay direktiba si Aberin nga ang pagbantay sa seguridad ang tutukan ug dili ang cellphone sa mga polis.

“Be aware of that kailangan during your official tour of duty dili mo magsige’g dula og cellphone, pwede mo-attend siguro og call pero iwasan nimo magsige og text kay unsaon man nimo pagbantay sa katawhan kung magsige ka og text,” pahinumdom ni Dalogdog.

Ipakatap ang kapulisan sa mga kalihukan nga mahitabo karong adlawa  hangtod na dayon sa Sabado Enero 20 nga Fluvial Procession ug Solemn Procession sa hapon ug sa adlaw’ng Domingo nga mao na gyud ang Sinulog Grand Parade nga mahitabo diha sa South Road Properties.

Kini aron sab nga dili mahago og maayo ang kapulisan nga nagbantay kay nakita sa CCPO nga kun kapoy na kaayo sila dili na sila epektibo sa pagbantay sa mga kalihukan sa Sinulog 2024.

“Ubay-ubay gyud atong kapulisan with the support of our Regional Director, sumala sa inyong nakita karon we have augmented another personnel kato ni sila nag undergo og mandatory schooling, naa pud tay kuhaon from the Sibonga so these are also undergoing specialized schooling, overwhelming gyud ang support nila para pud ni mahapsay ug dili exhausted ang atoang mga personnel,” sigon ni Police Lieutenant Colonel Janette Rafter, Deputy City Director for Operations sa CCPO.

Nasayran nga duha o tulo ka oras sa dili pa ang kalihukan ipakatap na ang kapulisan diha sa kadalanan.

Samtang ang Highway Patrol Group (HPG)-7 maoy convoy security sa tanang VIPs nga moabot apil na sab ang mga kalihukan sa Sinulog sama sa Traslacion ug Novena.

Ang HPG-7 dunay 23 highway cops nga ang uban gikan pa sa Probinsiya sa Bohol ug Negros Oriental nga gipaanhi sa Sugbo para motabang sa pagbantay.

“Sa Traslacion duna tay unom ka motorcycles mag-lead at the same time sad sa novena so naa tay unom ka motorcycle,” sigon ni Police Lieutenant Colonel Wilbert Parilla, Regional Chief sa HPG-7. (BANAT NEWS)