Mga gwardiya ug tanod gi-organize sa CCPO isip force multipliers

CEBU, Philippines — Ang Cebu City Police Office nagsugod na sa pag-organize sa security guards ug mga tanod isip ilang force multipliers.

Lakip kini sa ilang intensification efforts sa pagmentinar sa kahapsay ug kalinaw sa Dakbayan sa Sugbo ilabina human sa mga nahitabong insidente sa tulis ug pagpangawat sa siyudad.

Si Police Captain Jade Basingao, acting chief sa Carbon Police Station nagkanyon nga ang iyang mga personnel nakigkita sa mga security guard nga nadestino diha sa mga establisamento ug sa mga barangay tanod.

“Sinusubukan nating i-organize ang mga security guards to be utilized as our force multipliers”, matud ni Basingao diha sa Sugboanon channel.

Samtang si Police Major Francis Talosig, hepe sa Sawang Calero Police Station nagkanayon nga nagpahigayon sila og inspection sa mga establisamento sa pagsiguro sa ilang security measures.

“Constant coordination and collaboration sa atoang mga managers, security officers, bank managers”, matud ni Talosig.

Adunay gipahigayon usab nga security survey sa mga pawnshop, bangko ug gasoline stations.

Ang kapolisan sa siyudad nipahugot usab sa ilang police visibility sa business areas sa siyudad human si Mayor Michael Rama nanawagan kanila.

Sa laing kalamboan, si Bangsingao nanghinaot nga ang mga barangay ubos sa iyang hurisdiksiyon nga gilangkuban sa Ermita, Pahina Central ug Kalubian madeklara nga drug cleared.

Sa tulo ka nahisgutang barangay ang Kalubihan lang ang nadeklra nga drug-cleared sa Regional Oversita Committee on Barangay Drug Clearing niadtong buwan sa Abril sa nilabay’ng tuig.

Gipadayag ni Basingao nnga nihimo sila og mga inisiyatibo lakip niini ang “Children’s Haven” program nga makatabang sa pag-edukar sa street children.

Ang police station regular usab kining nagpahigayon og symposiums diha sa mga pampublikong eskwelahan.

Sa laing bahin, si Talosig nagkanayon nga ang iyang police station naningkamot usab batok sa pagpamaligya  sa ilegal nga drugas pinaagi sa padayong operasyon.

Ang iyang mga sakop nakakompiska kini og sobra sa walo ka kilong shabu gikan sa Agosto 2022 ngadto sa Agosto 2023  aron mokunhod ang presensiya sa mga mamaligyaay og ginadiling drugas diha sa iyang hurisdiksiyon.

Matud ni Talosig nga nigama usab sila og mga lakang aron ang ilang mga barangay mahimong drug-cleared.

Ang mga barangay nga ubos sa Sawang Calero Police Station gilangkuban sa Pasil, Suba, Sawang Calero, Calamba, Pahina San Nicolas ug San Nicolas Proper.

Gibutyag ni Talosig nga ang unom ka barangay ang gikonsidera karon nga seryosong apektado sa illegal drug activity.

Nasayran nga ang mga barangay sa Suba, Calamba ug San Nicolas Proper gikonsidera nga moderately affected samtang ang Pahina San Nicolas ug Sawang Calero ang slightly affected. — /BDB (BANAT NEWS)