35 kawani sa Mandaue ug Lapu-Lapu gitaktak

CEBU, Philippines — Gitaktak sa ilang trabaho ang 35 ka mga kawani sa  kagamhanan  sa Siyudad  sa  Siyudad  sa Mandaue ug sa Lapu-Lapu tungod  sa paggamit  sa ilegal nga drugas human sila napositibo sa surpresang drug test.

Sa Mandaue City, 20 ka mga kawani gikan sa nagkalain-laing departamento nga napositibo sa paggamit og ilegal nga drugas sa surprise drug test ang gitaktak sa miaging tuig.

Hinuon si Atty. Jamaal  James Calipayan, city administrator sa maong dakbayan miingon nga sa 20 nga gipangtaktak, gi-rehire og balik ang 10 ngadto sa 15 nga gitangtang kay nakalahutay sila sa drug rehabilitation program nga gipasiugdahan sa kagamhanan  sa maong dakbayan.

Matud pa ni Calipayan nga kadtong wala ma-rehire og balik, sila kadtong nagmagahi ug nagdumili sa pagboluntaryo nga magpa rehabilitate.

Sa nasayran sa miaging tuig 2023 ang mga kawani sa Mandaue City Hall ang  gipaubos sa surprise drug test nga gipasiugdhan  sa Mandaue City Substance Abuse and Prevention Office (MCSAPO) isip kabahin kini sa gitinguha nsa kagamhanan nga drug-free workplace policy.

Ang mga nagpositibo  sa drug test sa gipahigayon nga random drug test ang gipaubos usab kini sa confirmatory test nga pagahimoon sa Department of Health - accredited laboratory ug kadtong nakompirmar nga tiggamitan gyud og ilegal nga drugas, gi-terminate sila dayon sa Mandaue City Human Resource Management Office apan kadtong mipaubos sa drug rehabilitation gihatagan og ikaduhang kahigayonan aron magbag-o.

Samtang sa Lapu-Lapu City, 15 ka mga kawani sa City Hall nga nagpositibo  sa drug test nga gipahigayon apan nagdumili kini sa pagpaubos sa drug rehabilitation program ang hingpit nang gi-terminate ug wala na kuhaa og balik.

Si Garry Lao, executive   director sa  City of Lapu-Lapu Office for Substance   Abuse  Prevention (CLOSAP) miingon nga daghan pa nga mga random drug test ang pagahimoon alang sa pagkab-ot sa gitinguha nga drug-free workplace

Sa  nasayran nga ang Lapu-Lapu  City Hall ang adunay 5,000 ka mga regular,  job order ug casual  nga mga kawani.

Si Lao miingon nga kasagaran sa napositibo sa random drug test sa 2023 mga job order nga mga kawani.

Kataposan nilang nag-random drug testing niadtong Disyembre 28,2023 sa 118 ka sakop City Disaster Risk Reduction (DRRMO) ug tulo ang napositibo. – IBM (BANATNEWS)