CCPO naghuwat sa resulta sa autopsy sa teenager nga inahan
CEBU, Philippines — Gipaabot nalang sa Cebu City Police Office (CCPO) ang resulta sa autopsy sa patay’ng lawas sa 18-anyos nga inahan aron masuta ang hinungdan sa iyang kamatayon.
Sayo pa, ang pamilya ni Angela Arcilla, taga Sitio Cansagahan, Barangay Sudlon II, Dakbayan sa Sugbo nagtuo nga gipatay kini ug aduna sila’y gikatahapan nga naghimo sa krimen.
Kagahapon napaubos sa autopsy ang patay’ng lawas ni Angela diin gikan sa ilang panimalay sa Barangay Sudlon diin kini gihaya gidala diha sa Regional Forensic Unit-7 diin gipahigayon ang autopsy.
Gipasabot ni Police Lieutenant Colonel Janette Rafter, deputy city director for operations sa Cebu City Police Office nga wala dayon ma-autopsy ang patay’ng lawas tungod kay adunay procedure nga gisunod ug gaagad usab sila sa availability sa medico legal ilabi na sa Region 7 limitado ang medico legal ug dili lang Central Visayas ang giatiman sa doctor apil na ang mga silingang rehiyon.
“We can only depend gyud sa iyang availability and aside from that considering nga ang katong biktima was already na-embalm naa tay procedure ana but again good to know the cadaver of the victim is already at the crime lab in Lahug”, pasabot ni Rafter.
Matud ni Rafter nga makatabang ang autopsy sa pagdeterminar sa hinungdan sa kamatayon sa biktima kon suicide o gituok kini.
“We cannot speculate, we will wait the result of the autopsy”, ni Rafter pa.
Gipasalig usab sa CCPO nga gitutokan nila ang maong hitabo gani ang ilang imbestigador anaa kanunay ngadto sa lugar aron mag-coordinate sa pamilya ug magkuha og impormasyon nga makatabang sa imbestigasyon. BDB (BANATNEWS)
- Latest
