Nag-unang serbisyo ihatud sa kabarangayan sa Minglanilla

CEBU, Philippines —  Giandam na ang nagkalain-laing departamento sa lungsod sa Minglanilla alang sa ipahigayon nga serbisyo sa kabarangayan.

Gipakigtagbuan ni Atty. Junrie Bragat, city administrator sa lungsod ang tanan nga kapitan alang sa pagpangandam sa kalihukan.

Ilang gihan-ay ang matag eskedyul sa nagkalain-laing barangay.

Ang serbisyo nga ipadangat ngadto sa matag barangay mao ang free rabies vaccination, free late registration consultation, legal consultation, development permit, real property tax payment, free medical ug dental services, free medicines ug uban pa.

Kining maong programa gipasiugdahan ni Minglanilla mayor Rajiv Enad nga tinguha nga ihatud ang serbisyo ngadto sa matag tugkaran sa Minglahanon nga di na kinahanglan nga moadto sa munisipyo.

Sugdan ang ilang pagbisita sa matag barangay karong Nobiyembre 29 ning tuiga.

Ang mga eskedyul sa nagkalain-laing barangay i anunsyo ra sa umaabot nga adlaw. — MEL (BANATNEWS)