25 ka NPA sa Negros Oriental nitahan
CEBU, Philippines — Nibalik sa sabakan sa gobiyerno ang 25 ka miyembro sa New People's Army (NPA) ug miputol sa ilang koneksyon sa CPP-NPA atol sa presentation of surrenderees and handover of firearms ceremony didto sa City Hall sa Himamaylan City subay sa walay hunong nga pagpakigsandurot para sa kalinaw sa tropa sa gobiyerno sa Probinsya sa Negros Oriental.
Matud pa dunay 25 ka kaniadto sakop sa NPA diin lima kanila mga miyembro sa Milisya ng Bayan ug 20 ka regular member sa NPA nga mibalik na sa sabakan sa gobiyerno. Giingong mga salin sila sa mga nabungkag ng mga guerilla fronts, Central Negros 2 ubos sa Komiting Rehiyon Negros, Cebu, Bohol, ug Siquijor. Matud pa ang walay puas nga operasyon sa mga tropa sa 94th Infantry Battalion sa 303rd Infantry Brigade sa Joint Task Force Spear ug Philippine National Police sa Barangay Tambo, Ayungon, Negros Oriental maoy nakaaghat kanila sa pagtahan.
Usa sa mga mitahan ang miangkon nga gibalewala sa CPP-NPA ang moral sa ilang mga miyembro. Gikapoy na sab sila og sige’g dagan ug tago. Gitahan sab nila ang walo ka armas, unom niini shotguns ug duha ka kalibre .38 revolvers nga dunay mga bala.
Si Brigadier General Orlando Edralin, Commander sa 303rd Infantry Brigade midayeg sa mga nitahan nga gitawag niyang “Friends Rescued” sa pagpili sa kalinaw ug kausaban.
Samtang si Lieutenant General Benefict Arevalo, Commander sa Visayas Command midayeg sa iyang mga tropa sa wala'y kakapoy nga pagpatuman sa nagkalain-laing peace initiatives sa Negros Island. "This is the product of our commitment and dedication to curb the insurgency in the region. This influx of surrenders from the ranks of the CPP-NPA delivered a substantial blow that will further weaken the terrorist group," sigon ni Commander Arevalo. (BANAT NEWS)
- Latest
