Mga vendors sa Brgy Tabunok patabangon sa kahapsay ug kalinaw

CEBU, Philippines —  Mohangyo ang mga sakop sa City of Talisay-Traffic Operation Development (CT-TODA) ngadto sa mamaligyaay sa sidewalk nga motabang sa pagpatuman sa kahapsay ug kamalinawon sa lugar diin sila namaligya.

Kini usa sa mga hangyo ni Jonathan Tumulak, pangu sa CT-TODA sa dihang gihimo na nila ang pakigtagbo sa mga sidewalk vendors diha sa Barangay Tabunok.

Matud pa ni Tumulak nga gihangyo niya ang mga vendors nga motabang sa pagpaniid ug ilhon ang mga esnatser ug tulisan sa dapit aron dili kini makapamiktima og inosenting indibidwal.

Ang opisyal sa CT-TODA nitataw nga gawas sa pag ila sa mga dautang elemento gihangyo sab sila nga moatras sa ilang pagdisplay sa mga baligya.

Ilang gisiguro nga dili sila molapas sa pedestrian lane o mohatag gyud og agi-anan sa mga tawo aron di sila mosubay sa dalan nga mao sab ang makapahinay sa dagan sa trapiko.

Niadtong miaging semana, nisibog na ang mga sidewalk vendors aron di sila mapapahawa sa ilang pwesto.

Gipanglantawan sa CT-TODA nga mas modaghan pa ang mga tawo karon sa kamerkaduhan gumikan kay nagsingabot naman ang kapaskohan.  MEL (BANATNEWS)