Mga bayot nga nagbugno sa pista sa Talisay City, ipatawag ni Gullas

CEBU, Philippines — Mga naglambigit sa rambol sa Dakbayan sa Talisay buntag sa adlaw nga Domingo nga sakop sa LGBTQ+ ipatawag ni Mayor Samsam Gullas sa kapulisan.

Matud pa sa mayor, unang opsyon mao ang pagtawag sa duha ka nalambigit nga grupo sa nahitabo nga away ug husayon sila ug higalaon ug kung mahusay na sila mahunong na usab ang maong insidente.

Sumala pa Gullas, gi-locate na karon sa kapulisan ang mga nalambigit sa panghitabo aron maabot sila ug mahusay ang maong problema.

Gitug-an ni Gullas, nailhan na sa kapulisan ang mga nalambigit sa kagubot ug ipatawag kini sila aron mahusay ang ilang bangi.

Gibutyag sa mayor lisod na kung makainom ang tawo tungod kay dili na gayud makontrolar ang ilang mga emosyon, hinungdan mapasalamaton gihapon siya sa kapulisan tungod kay gihimo nilang tanan alang sa kalampusan sa tanan nilang mga kalihukan ug ilaha gayud nga gihimo ang ilang mga trabaho.

Bisan sa nahitabong rambol, gihulagway sa mayor nga nagmalampuson ug malinawon sa kinatibuk-an ang pagsaulog sa pista sa dakbayan. Sumala pa ni Gullas, kung dili gayud magkahusay ang matag habig lahi na usab kini nga tukionon.

Sa video nga nikatap nakita ang duha nga naglinabnutay sa mga buhok ug nagbugno samtang adunay pipila nga niuwang ug duna say nagsige og sugnod.

Ang maong insidente gituohan nahitabo buntag adlaw nga Domingo ug parehong gituohan nga nakainom. (BANAT NEWS)