Gipatay sa iyang iro?

CEBU, Philippines — Napalgang patay ang usa ka 63- anyos nga lalaki nga gituohang gipatay sa iyang mga binuhing  iro diha sa iyang pinuy-anan sa Sitio Molila, Barangay Lawaan 1, Dakbayan sa Talisay kagahapon sa buntag.

Ang namatay mao si George Mayol, 63, ulitawo nga nagpuyo sa nahisgutang lugar. Si Winston Empleo nga silingan sa biktima nibutyag nga niadto pang Lunes katapusan niyang nakit-an ang namatay.

Natingala sila nga wala na kini migawas sa balay nga unta kada adlaw man unta nila kining makita kay magpatabang sa pagtugway sa iyang binuhing kanding.

Tungod sa katingala, silang mga managsilingan nangahas sa pagsud sa pinuy-anan ni Mayol, mao nalay ilang kakurat pagkakita kaniya nga nagyaka sa pansayan nga wala nay kinabuhi ug adunay daghang samad nga gituohang pinaakan sa iro. Gipahibalo sab ni Empleo nga niadtong Hulyo tuig 2022 napaakan si Mayol sa iyahang binuhi nga iro.

Usa ka Dina Reponte, suod nga higala sa namatay nitataw nga pirmeng paakon sa iyang mga iro si Mayol ug niadtong Hulyo 2022 maoy grabe kay nakaangkon kini og daghang pinaakan sa bukton ug sa baba maong naa kini ka 56 ka tahi sa mga samad tungod sa paghambat sa binuhi niining iro.

Sigon pa ni Reponte nga adunay itom nga iro si Mayol nga pwerteng pagka-igihan ug seloso. Subay sa iyang nahibaw-an mixed-breed kini nga German Shepherd ug Dobberman.

Adunay lima ka iro si Mayol, usa ka itom ug brown ang kolor ug laing upat ka puti nga iro.

 Kung iyang hagwa-hagwaon ang mga puti nga iro magselos ang itom nga iro mao to siya nga gipaak.

Punterya ang iyang liog pero napugngan kini og diha sa bukton napakaan,  nagkanayon si Reponte bahin sa mga unang insidente nga gipaak si Mayol sa iyang iro.

Si Rodrigo Mayol, 61, igsuon sa biktima miingon nga gipasidan-an na niya iyang maguwang nga di na mamuhi og iro, apan dog lover kini ug wala gyud patuo.

Si Mayol nag-inusarang nagpuyo sa 2,000 square meters nga luna samtang iyang mga igsuon nagpuyo sa Syudad sa Sugbo. Si Police Corporal Clifford Lerio, imbestigador sa Talisay City Police niingon nga tanan anggulo ang ilang subayon sa kamatayon ni Mayol.

Apan sa inisyal nila nga paghiling sa mga samad niini, posible nga gibugno si Mayol sa iyang iro hangtud nga namatay. (BANAT NEWS)