Dunay kauban sa pagpatay?

CEBU, Philippines —  Wala gisalikway sa kapulisan sa Toledo City Police Station ang posibilidad nga duna pay laing suspek sa pagpatay sa 17-anyos nga si Sharmaine Flores ug napalgan diha sa Purok 2, Barangay Bunga sa maong dakbayan niadtong Biyernes sa buntag.

Una niini, gisikop sa Toledo City Police Station si Jonathan Sugabo, 29, human nga siya maoy gitudlo sa mga saksi sa kapulisan nga giingong nagsunod kang Sharmaine dihang nagpa-load kini sa iyang cellphone niadtong Huwebes sa gabii.

Si Police Lt. Col. Manolo Salvatierra, hepe sa Toledo City Police Station usa pa lang ang suspek nila karon, apan gitan-aw sab nila  kung aduna pay laing kauban ang dinakpan sa pagbuhat sa maong krimen.

Matud pa niya dili sila mohunong hantod nga dili sila makakuha og dugang mga ebidensiya nga makatabang alang sa paghatag og hustisya sa nahitabo sa biktima.

"So far ngayon isa pa lang, titignan natin (may kasama) hindi natin dini-discount na may possibility pa," matud ni Salvatierra.                

Mga testigos

Dako ang pagsalig sa kapulisan sa pamahayag sa mga witnesses bisan walay CCTV camera sa lugar sa nahitaboan, apan giklaro niya nga siguradohon nilang mobarog sa korte ang ilang kaso.

"Talagang magre-rely tayo sa eye witnesses...Normal naman na magde-deny siya pero siyempre ang reference naman natin dito is ‘yung accounts ng mga witnesses natin," dugang ni Salvatierra.

Nasayran nga gipaubos sa DNA test ang suspek aron pagtino kun motakdo ba ang mga ebidensiyang nakuha gikan sa crime scene ngadto kaniya.

Lakip sab sa gipaabot sa kapulisan ang autopsy report aron mahibaw-an kung unsa gyud ang gikamatyan ni Sharmaine.

Gihangop sa Cebu Police Provincial Office pinangulohan ni OIC Provincial Director Colonel Noel Flores ang paspas nga aksyon ug pagpatim-aw sa mga saksi aron mailhan ang suspek.

“We assure the parents of the 17-year-old girl and Toledohanons that justice will be served," matud ni Salvatierra.

Sige og tan-aw

Ang pamilyang Flores sa pagkakaron kumbinsido gyud nga si Sugabo alyas Atan mao gayud ang gapatay sa biktima.

Matud pa ni Anna Maria Flores, inahan sa biktima nga kumbinsido siya nga si Sugabo ang nagpatay sa iyang bugtong anak nga babaye kay pirme nila kining masakpang magsige og tan-aw sa iyang anak sa higayon nga magkatagbo sila sa dalan.

Dako sab ang pagsalig ni Flores sa mga testigos nga nangangkong nakakita sa dapit diin nakit-an ang patay nga lawas sa iyang anak.

Autopsy report

Usa sa mga igsuon sa biktima nga si Juanito nitug-an nga base sa medico legal report, ang ang gikamatyan sa iyang manghod mao ang pagtuok ug kini gipahimuslan gyud. Wala hinuoy opisyal nga gibuhiang pamahayag ang kapolisan kabahin sa matud pa autopsy report nga gitug-an sa igsuon sa biktima.

Wala pa makapugong sa iyang pagbakho si Juanito tungod kay matud niya dili makiangayon ang nahitabo sa iyang manghod kay buotan man kini ug taas kaayo pangandoy sa kinabuhi.

Mosuyop

Ang suspetsado sa dihang gipangutana sa media hugtanon gihapong nihimakak nga may kalambigitan siya sa kamatayon sa biktima.

Sumala pa niini nga niagi lang siya sa maong dapit tungod kay mopadulong siya sa tambayan sa motor. Miangkon siya nga adto siya magpaabot og mosugo kaniya pagpalit og drugas.

Gitug-an sa suspetsado nga atol sa pagkasikop niya dili siya sabog sa ginadili nga drugas apan iyang giangkon nga mosuyop siya ug gani niadtong adlaw nga Miyerkules uwahi siyang nakasuyop.

Gihimakak sab niyang naibog siya sa biktima.—  Rowena D. Capistrano/IBM (BANAT NEWS)