CEBU, Philippines — Gibarogan ni Simeon Gabutero ang iyang pamahayag nga si Roberto Gabison alyas “Insik” ang nagsugo kaniya sa pagbaligya sa cellphone ni Rhea Mae Tocmo ug kini usab ang kataposang kuyog ni Tocmo sa wala pa napalgan ang patay’ng lawas sa biktima nga gisulod og carton ug gigapos daplin sa karsadad sa Sitio Mohon 1, Barangay Tisa, Siyudad sa Sugbo niadtong Hulyo 17, 2023.
Kini human si Gabison nihimakak nga kaila siya ni Gabutero ug nagkanayon nga dili si Gabutero ang iyang gisugo sa pagprenda sa iyahang cellphone.
Sayo pa, si Gabutero nadakpan sa kapolisan sa Cebu City Police Office gumikan sa illegal possession of firearms apan nahibaw-an sa kapolisan nga mao kini ang ilahang gipangita nga nagbaligya sa cellphone ni Tocmo.
Si Gabutero nibutyag nga Domingo sa udto Hulyo 16, 2023 nag-abot sila ni Gabison sa tulay sa Barangay Banawa ug gisugo siya nga pasuwayan sa pag-abli ang cellphone ni Tocmo sa mga tindahan diha sa dalan Colon apan kay mahal og bayad iyaha nalang kining gibaligya og P1,700.
Pagkahalin sa cellphone nagkita sila ni Gabison alas 6:00 na sa gabii sa samang adlaw ug iyahang gihatag ang P1,700 ug gitagaan siya og P500 ug giingong nisulti si Gabison nga kon adunay mangutana ang iyahang isulti mao nga wala siya kahibawo ug wala siya kaila.
Nakahibawo si Gabutero nga gipangita siya og polis upat ka adlaw human mabaligya ang cellphone kay nakahigayon siya sa pagtan-aw og Facebook nakuyawan na siya nga maoy gitumbok nga nagpatay kang Tocmo.
Gibutyag ni Gabutero nga sa Domingo sa alas 5:00 sa buntag nakit-an nila si Rhea Mae ug Gabison nga naglalis diha sa tulay diha sa Banawa duol sa eskwelahan naklaro niya ang hitabo tungod kay adunay suga diha sa taytayan.
Sigurado usab siya nga si Tucmo ang uban ni Gabison niadtong higayona tungod sa gisul-ob sa biktima nga maong short nga itom ug jacket nga itom.
“Ana siya dako na siya og gasto anang bayhana, ana siya piste! ka dako nako og gasto nimo unya giagbayan siya og hugot sa liog, padong man ko mopalit og tambal ato sa akong samad”, padayag ni Gabutero.
Andam mo witness si Gabutero aron mahatagan og hustisya ang kamatayon ni Tocmo. Samtang ang mga pamilya ni Tocmo nanawagan kini og hustisya sa kamatayon sa biktima. BDB (BANATNEWS)