CEBU, Philippines — Ang Department of Education 7 mohimo og kaugalingong imbestigasyon mahitungod sa magtutudlo sa Dakbayan sa Carcar nga gireklamo sa duha ka 15-anyos nga mga tinun-an nga sila gimolestiya niini.
Si Direktor Salestiano Jimenez nga nahinabi sa GMA Super Radyo DYSS nibutyag nga mopadala siya sa legal team aron mohimo sa imbestigasyon.
Matud niya, dili sila manghilabot sa reklamo sa mga bata nga nasang-at na sa kapolisan , ang ilaha mao ang bahin sa administratibang tulobagon sa maong magtutudlo.
Una niini, duha ka menor de edad nga babaye nga mga tinun-an sa pampublikong tunghaan sa usa ka public high school sa maong siyudad ang nireklamo tungod kay gihikap ang ilang dughan ug ang kinatawo sa ilang math teacher. Ang usa sa mga reklamante miingong na nahitabo ang pagmolestiya kaniya niadtong Marso ning tuiga ug ang usa niadto lang nakalabay nga buwan sa sud sa faculty room sa maong tunghaan.
Si Police Lt. Mark Gifter Sucalit, hepe sa Carcar City Police nibutyag nga ipaagi nila kini sa regular filing ang pagpasaka sa kaso batok sa maong magtutudlo.
Si Jimenez miingon nga kung mapamatud-an sa ilang imbestigasyon nga sad-an gyud ang maestro matangtang gyud kini sa serbisyo. IBM (BANATNEWS)