Presidente Marcos gipaabot nga motambong sa ABAC

CEBU, Philippines — Magpatuman og hugot nga seguridad ang Police Regional Office sa pagsugod na unya sa APEC Business Advisory Council(ABAC) nga himoon diha sa Nustar Convention Center gikan sa Hulyo 27 hangtud sa Hulyo 30 tuig 2023. Gawas sa 200 ka mga registered delegates nga gilaumang apil sa maong kalihukan giingong motambong sab si Presidente Ferdinand Marcos Jr. sa ABAC.

Matud ni Police Lt. Col. Gerard Ace Pelare ang tigpamaba sa PRO-7 nga mag full alert status sila alang sa maong kalihukan apan iyang giklaro nga wala sila’y hulga nga nadawat base sa ilang intelligence monitoring.

Nakig-alayon na sab ang PRO-7 sa Local Government Units(LGUs) ingon man sa organizers sa kalihukan aron masiguro ang kaluwasan ug seguridad sa mga delegado.

Wala gisalikway sa PRO-7 ang posibilidad nga dunay magpahigayon og lihok-protesta sa pagsugod na unya sa maong kalihukan kay usa kini ka international event hinungdan nga gipangandam na sab nila kini.

“We are preparing for this eventuality but as of this moment wala pa tay na-monitor sa atong intelligence monitoring, nag-coordinate pud ta sa Local Government Unit kay og ugaling naay mo apply didto og permit nga mag-rally we can already cooperate and coordinate para ma-remind sad sila nga to always to the line, to always follow the law para wala tay dagkong security issues”, matud ni Lt. Col. Pelare. Magpakatap og daghang police ang PRO-7 dili lang sa dapit kun asa himoon ang ABAC apan lakip na sab sa mga tourist destinations kay sila nagtuo nga ang mga delegado modalikyat sa pagbisita sa mga nindot nga mga suroyanan sa Central Visayas. (BANAT NEWS)