Visayan Electric mopatuman og bag-ong Lifeline Subsidy Rate

CEBU, Philippines —  Ang Visayan Electric mopatuman sa bag-ong Lifeline Subsidy Rate Guidelines sugod karong umaabot nga Agosto 1, 2023.

Ang Lifeline Rate subay kini sa Akta Republika 10150 kun “Electric Power Industry Reform Act of 2001” nga nagtumong sa subsidized electricity rate nga gihatag ngadto sa mga kwalipikadong kustomer nga adunay binuwan nga konsumo sa kuryente nga dili molapas sa 100kWh.

Apan sa pagkakaron ubos sa bag-ong Lifeline Subsidy Rate subay sa Akta Republika 11552 kun “An Act Extending and Enhancing the Implementation of the Lifeline Rate, Amending for the Purpose Section 73 of Republic Ac No. 9136, Otherwise known as the “Electric Power Industry Reform Act of 2001,” As Amended by Republic Act No. 10150” naglatid nga gawas sa 100kWh ug ubos nga konsumo sa kuryente ang lifeline rate magamit ra sa beneficiaries sa 4Ps o kadtong mga panimalay kinsa ang binuwan nga kita sa pamilya ubos sa Philippine Statistics.

Si Quennie Sanchez-Bronce, Visayan Electric Reputation Enhancement Manager nagkanayon nga una nang gipahibawo nga ang mga konsumidor kinsa ang konsumo sa kuryente matag buwan 100kWh paubos ang kwalipikado nga mo-apply isip beneficiary ubos sa bag-ong joint policy sa enhanced lifeline subsidy sa Department of Energy, Department of Social Welfare and Development, ug Energy Regulatory Commission.

Base sa gipagawas nga kwalipikasyon sa Visayan Electric mahimong mopahimulos ang kustomer sa Visayan Electric nga 4Ps o non-4Ps beneficiaries kinsa ang panginabuhi ubos sa poverty threshold.

Ang kustomer nga adunay 100kWh nga binuwan sa konsumo apan anaa magpuyo sa mga subdivision, village ug uban pa sa susama nga komunidad dili mahimong makapahimos niini.

Dili usab kwalipikado kadtong mga nagpuyo sa condominiums ug labaw na ang mga konsumidor nga dili beneficiary sa 4Ps o nahisakop sa marginalized sector nga giila sa Social Welfare and Development Office.

Ang mga kwalipikadong kustomer sa Visayan Electric kanahanglan pa nga mo apply aron makapahimulos sa Lifeline Subsidy.

Sugod sa Agosto 1, 2023 ang mga kwalipikadong kustomer sa Visayan Electric mahimo nang makapahimos sa mga gimantala nga discounts apan pahimangno usab nga ang discount magdependw sa pagkonsumo sa kustomer. Ang bag-ong Lifeline Subsidy Rate Guidelines gipatuman isip tabang sa mga kabus. Theresa March Valle, CNU Intern, BDB (BANATNEWS)